Pynrem ka MGSPHSVA ia ka SMB ba pynslem ban sam ia ki CoV ia ki nongshong dukan madan

Shillong, Nailur 24 : The Meghalaya Greater Shillong Progressive Hawkers and Street Vendors Association (MGSPHSVA) ka la kynthoh tyngeh pyrshah ia ka Shillong Municipal Board (SMB) halor ka jingkynnoh ba ka leh khnang ban shu trei thohmut thohmat ha ka ban ai ia ki Certificate of Vending (CoV) ia ki nongshong dukan madan ha thain Khyndailad, kaba lam sha ka jingpynslem.

Ka nongialam ka TUR Kong Angela Rngad haba kren na ka bynta ka MGSPHSVA sha ki lad pathai khubor ha ka sngi Balang, kala ong ba bun ki nongshong dukan madan kim pat ioh satia ia ki CoV jong ki, kaba la ktah jur ia ka kamai jakpoh mynta la arbnai shiteng.

Kala buh jingkylli ruh iaka jingleh arsap jong ki borkhmih, da kaba kdup ia ki khep ba ki briew ki bym pat leh survey kila shah phah kyrteng ban ioh ia ka CoV, katba ki nongshong dukan madan ba dei hok ia kiba la dep survey, ym shym la phah kyrteng.

Ka kong Angela kala kdew ruh ia ki jingbakla ha ka thup jong ki nongshong dukan madan bala phah kyrteng, kynthup iaki briew kiba la aidak ba pep wat kila wan iashimbynta bad kito kiba la aidak ba khlem pat survey watla ka dep survey. Kane ka thup la pynmih ha ka jingialang jong ka Sub-Committee bala thung da ka Provisional Town Vending Committee (PTBC) ba long ha ka 22 tarik Nailar.

Kane ka nongialam ka TUR kala kynnoh ruh ba don ka bamsap ha ka rukom treikam, haba kdew ia ka jingjia ba ki bahaiing jong ki nongkitkam jong kiwei ki seng la phah kyrteng ban ioh CoV watla ki dei ki bym pat dep leh survey.

“…ki briew ki bym pat ju shong dukan madan ha ka jingim jong ki, la shem ba ki don haduh san-hynriew tylli ki kyrteng ba ki dei ki bahaiing jong ki nongkitkam jong kiwei pat ki seng. Mynno kine ki briew ki aplai bad balei ba pdiang ia ki ha ka thup bala ai kyrteng namar ki dei ki bym pat don ha ka jingleh survey.

Ka Seng kala ban jur ruh ba ka jingduna ki CoV kala ktah jur bha ia ki nongshong dukan madan, kiba la shem ba ka jingdie mar jong ki kala hiar bha bad kila hap iaksaid ban lah pyndap ia ki jingdonkam lajong.

Ka kong Angela kala ong ba ka song jingiarap ba shisien ai ba T.10,000 da kaSorkar Jylla sha ki nong shongdukan madan khamtam ia kito ki bym pat ioh ia ka CoV, kam pat biang satia ban weng ia baroh ki jingeh ba kila iakynduh.

Kala ai nuksa ia kawei ka nongshong dukan madan kaba la hap ban pynsangeh ia ka Khun na ka jingleit college (kaba la rung klas ban pule BSc) namar ka jingbym don pisa ban siew bai klas.

Ka Seng ka dawa ba ki borkhmih ki dei ban leh eiei noh mardor ha kaban pynbeit ia kine kiei kiei baroh bad ban pynthikna ba ki nongshong dukan madan ki ioh ia ki CoV ha ka lynti kaba shai bad ba don ka jingbahkhlieh.