Shillong, Nailur 24 : U Myntri ka Tnad Food Civil Supply & Consumer Affairs bad Labour Employment & Skill, Bah Methosiud Dkhar ha ka sngi Balang, ula pynpaw ia ka jingsngew nguh ia u Myntri Rangbah Conrad K Sangma ba pynrung ia u ha ka Kynhun Myntri bad kular ba ki kam ba hakhmat eh jong u ki long ban pynthikna ba ki Tnad ba u bat kin shakri bha ia ki paidbah khamta sha ki shnong ki thaw.
“Nga pynpaw ia ka jingsngewnguh ia u Myntri Rangbah b aula ibit ia nga ban don ha ka kynhun Myntri bad ki Nongialam ka Party lem bad ki nongtrei bad ki paidbah na ka constituency jong nga” ong une u MLA ka HSPDP na Mawshynrut.
U Bah Methodius ula ioh khmih ruh ia ka Tnad Registration & Stamp bad ka Cooperation, ula iathuh ba ha ki lad pathai khubor ba u kwah ban don ia ka rukom treikam kaba kdup lang ia baroh.
“Nga kwah ban don ia ka rukom treikam kaba kdup lang ia baroh, ngan sa lum ia ka jingialang bishar kam bad ki Ophisar jong ki tnad ba nga khmih. Hooid, ki don ki kynhun kiba don bynta ha kane ka rukom treikam. Kumta, ngan s alum ia ka jingialang bishar kam bad ki bad hadien ngan sa peit ia kaei kaba bha tam ba ngi lah ban leh kum ka Tnad ba kan shakri bha ia ki paidbah” ula ong.
Une u Myntri thymmai ula ban jur ruh ia ka jingkongsan ban iatreilang hapdeng ki kynhun bapher bapher, kynthup ki Ophisar bad ki Nongtrei, ban jop ka Tnad ha ka jingtreikam.
Haba iadei bad ka tnad Labour, u Bah Methodius ula ong ba ka long kaba donkam ban shong bishar bha ha kaban pynkhlain ia ka jinglah jong ka Tnad ba kan iada ia ka bha ka miat jong ki nongbylla bad ki nongaikam ruh kumjuh.
Halor ka jingwan rung beain ki nongbylla na bar jylla, u Myntri ula kubur ba ka dei ka kam kaba jyrwit jyrwat bha bad ong ba u don ka jingthmu ban lum ia ka jingialang bishar kam bad ka Tnad ban sngew thuh ia ki sienjam bala shim haduh mynta bad kwah ban shim noh ia ka sienjam kaba biang eh ka ban iada ia ka bha ka miat ki nong Meghalaya haba pynthikna ba ki jingpyntrei ia ki jingtei kin ym shah pynthut.
