Pynsdang ki nonghikai adhoc ia ka jingiakhih ba mynthi ka Sorkar ia ki jingdawa

Shillong, Nailur 22 : Ki nonghikai skul Adhoc kiba don hapoh ka lama jong ka Federation of All School Teachers of Meghalaya (FASTOM) ha ka sngi Nyngkong, kila pynsdang ia ka jingiakhih da kaba iaid paidbah bad shong kyllain mungor khlem pud, ban pynbor ia ka Sorkar ba kan kyntiew kyrdan noh ia ki skul bad nonghikai Adhoc sha ka Deficit system.

Ka Federation kala dawa ruh ia ka jingsiew ba kham biang bad ki jingmyntoi na ka bynta ki nonghikai adhoc, kynthup ka jingkyntiew kyrdan sha ka deficit system, 5% ka increment ba man u snem, ka jing pynjlan ia ka rta shongthait na ka 60 snem sha ka 65 snem, ka jingpynkynmaw kaba la phah sha u Myntri barim ka Tnad Pule Puthi Rakkam A Sangma ha ka 17 tarik Lber, 2023.

Ka tulop ba ki nonghikai adhoc ki ioh mynta ka long na ka T. 18,000 ia ki Lower Primary, T.22000 ia ki Upper Primary, T.29000 ia ki Secondary, T. 31000 ia ki nonghikai Science bad T. 33000 ia ki Higher Secondary.

Haba kren sha ki nongthoh khubor ha kane ka jingiakhih, u Vice President ka FASTOM S Jungai ula ong ba la pynbor ia ki nonghikai banmih sha surok namar ka jingbym lah jong ka Sorkar ban leh eiei halor ki jingdawa ba shonghok mynta la bun bun snem.

“Ngi dawa ban kyntiew kyrdan noh ki skul bad nonghikai adhoc sha ka deficit, ka ban pynkiew ia ka tulop bad ki jingmyntoi. Kumta, ngi la dawa ia ka Sorkar ba kan wanrah da ka policy ba kan pynduh noh ia ka adhoc system, ban pynthikna ia ka jingkiew ka tulop kumba leh ia kiwei pat ki nonghikai” ula ong.

U Vice President ula kdew ruh ba bun ki nonghikai adhoc ki ia don ia kajuh ka kyrdan pule kumba long kiwei ki nonghikai hynrei kila ioh pat ia ka jingsiew kaba duna, kaba iapher bak ly bak ha ka jingsiew.

U ong ba ka Sorkar Jylla kala pynpaw ia ka jingduna pisa kum ka daw ba pynslem ban pyntreikam ia ka jingdawa ka FASTOM. Hynrei, ki nonghikai ki iasaid ba ki synniang jong ki sha ka kam pule dangle ka dawa ban ioh ia ka buria ba kham biang.

Ula pynpaw ia ka jingbym sngewtynnad ba ka State Education Commisson ka khlem lah ban ai kano kano ka jingai jingmut ban pynkiew ia ka tulop jong ki nonghikai adhoc.

Kat kum ka jingong jong u, ki nonghikai ki dawa ia ka burom halor ka kam ba ki trei, haba kdew ba u nonghikai adhoc uba la shakri la palat 30 snem, u sei ia kajuh ka tulop kum kito ki nonghikai ba dang shu thungkam thymmai.

Ula pynbna ba ki nonghikai kin pynbteng ia ka jingiakhih ba jai jai katba ka Sorkar kam pat leh eiei halor ka jingdawa jong ki.

“Lada ka Sorkar ka lah ban leh eiei noh ia ki jingdawa hapoh ka shisngi ne arsngi, kan bha palat, hynrei lada kam lah, kin sa nang shim ia kiwei pat ki lad ki lynti ban pynjur ia ka jingiakhih” ong u Bah Jungai.