Shillong, Nailur 17 : Ka Tour Operator Association of Meghalaya (TOAM) kala kyntu ia ka All Khasi Meghalaya Tourist Taxi Association (AKMTTA) ban pynsangeh noh ia ka jingiakhih ka jongka bad ban iakren ki jingeh jongka bad ka sorkar jylla.
“Ha kum kane ka khyllipmat kaba kongsan, ka TOAM ka kyntu ia ka AKMTTA ban pynsangeh noh mardor ia ka rukom pynlong ia ka jingiakhih bad ban rah ia ki jingsngewkhia ki jongka sha ka sorkar jylla da kaba iakren shimet. Ngim lah ban ‘Risk’ ne buh jingma na kane ka jingiakhih kaban lam sha kaban pyntroin ia ki nongjngohkai ban wan shapoh ka jylla” la ong u President ka Association u Bah E. Banlumlang Blah haba iakren bad ki nongthoh khubor hynne ka sngi Balang.
Kala phah ruh ia ka shithi sha ka AKMTTA hadien ba kala don ka jingbteng ban pynkynriah ia ki Tour ne jingialamkai kiba la dep ban pynbeit lypa ban mih na Meghalaya sha kiwei pat ki jaka jong ka thain shatei lam mihngi ka ri.
“Kane ka rukom leh kala ktah jur, kaba iasyriem bad kaei kaba ngi lah sakhi ha u snem uba la dep, kaba la dep ban lam sha ka jinghiar kynsan jong ka jingwan ki nongjngohkai ha kine ki khyndiat bnai kiba la dep” ong u Bah Blah.
“Lada kane ka rukom leh ka dang iai bteng, ka jingktah kan long kaba iar bha ia kaba yn ym lah ban pynbeit shuh. Ki nongjngohkai kiba la shah pynphai shisien kin ym wan phai shuh. Hynrei kin leit shi syndon ban jied ban leit noh sha kiwei pat ki jaka, da kaba ieh bad pyntroin noh shi syndon ia ka kam jngohkai ha ka jingdkoh. Ki Hotel kin sa thylli, ki Restaurant kin mad ia ki jingeh, ki kali taksi kin ym ioh kamai bad ban buh ruh ka jingtei kaba baroh shi kata da ki phew snem ban biang ka kamai kajih ka nsa khyllem noh jrain. Da kaba shai, lada kane kan dang iai bteng, ka karkhana ka jong ngi kan iap” ula maham.
Ula pynpaw ba ka jingneh jong ka kam jngohkai ha ka jylla Meghalaya ka shaniah tylli ha ka na kiei kiei ki jingiatreilang kaba mynta, ka jingpynslem ne ka jingbym jynsur kan lam sha ka jingheh ha kaban pynkhyllem jrain ia kaba ngi baroh ngi pyrshang ban kiar.
“Ngi kynti ia ka association jong phi ban shimkhia noh mardor ia kane ka mat da ka jingsngewkhia kumba kadei ban ioh bad ban ai ka jingkular ban leh ia kaei kaei kaban ym pynthud ia ka jingwan ki kali Tourist ne Taxi na Assam kiba thrang ban leh sngewbha bad ka jingitynnad jong ka jylla jong ngi” ula bynrap.
Ka AKMTTA kala shim iaka rai ban pynlong i aka jingiakhih kaba khlem sangeh naduh ka 16 tarik u Nailur, da kaba dawa na ka sorkar jylla ban khang (Ban) ia ka jingwan rung jong ki kali Tourist kiba nabar ka jylla sha ki jaka jngohkai kiba don ha kylleng ki bynta jong ka Meghalaya.
 kala kyntu ia ka All Khasi Meghalaya Tourist Taxi Association (AKMTTA) ban pynsangeh noh ia ka jingiakhih ka jongka bad ban iakren ki jingeh jongka bad ka sorkar jylla.){kind=link}