SHILLONG, Nailur 6: Ki pulit ka jylla kila ioh ban pyntroin noh ia ka kynhun ki runar tuh Bike da kaba la kem ia ki 17 ngut ki briew ba kynthup lang ruh ia 10 ngut ki nong Bangladesh bad kem ruh ia ar ngut ki khynnah rit.
Ïa kane ka jingkhynra la sdang hadien ka jingjur ki kam tuh bike ha East Khasi Hills District, khamtam eh ha nongbah Shillong.
“Baroh ki briew kiba la shah kem ki long 17 ngut bad 2 ngut ki khynnah rit kiba la shah kem ha kaba donkti ha ka kam tuh bike” ong u Superintendent of Police ka East Khasi Hills u Bah Vivek Syiem ha ka kyrwoh ba la pynmih ha ka sngi Thohdieng.
Ki 9 ngut na ki 19 ngut kiba donkti ha kane ka kam runar ki dei na ki shnong – Barato, Dawki bad Jowai – kiba hap ha West Jaiñtia Hills district.
Ha ka 4 tarik u Nailur, ki pulit ka Mawryngkneng ki la ioh ban kem ia u Nehlang Lamare (24) na ka shnong Barato bad ia u Klement Timung (18) na ka shnong Caroline, Jowai katba ki dang pyrshang ban phet krad da ka scooty ba kila tuh. Hadien la lap ia katei ka scooty kaba don ia u number ML 05 X 5909 ba la shu iehnoh ha Main Road, Mawryngkneng.
Lah ban kdew hangne ba lai ngut ki nongpdiang ia ki bike tuh la tip kyrteng kum u Peter Pohrmen (18 snem), u Vicky Dhar (20 snem) bad u Romeo Ryngksai (24 snem) baroh kidei na Dawki, la kem ia ki da ka kynhun special cell, East Khasi Hills, na Nongtalang.
Katkum u SP, na ka jingtohkit la lap ba ia ki bike ba la shah tuh la dep ban aiti sha ki nongpdiang ia ki bike sha Bangladesh.
U Bah Syiem u la iathuh ba ka jingkhynra lang hapdeng ki pulit ka East Khasi Hills bad ki pulit ka West Jaintia Hills ka la pynlong ban ioh kem sa 14 ngut ki riew shimet, ba kynthup ia ki Dalal (Tout) bad 10 ngut ki nong Bangladesh kiba pdiang ia ki mar tuh.
Na ki 14 ngut, u Deimionjongmi Paslein (25 snem), u Barister Lamare (20), uwei uba 15 snem bad Last born Lamare (21 snem) ruh ki dei na ka shnong Barato.
Kitei ki 10 ngut kiba la shah kem na Bangladesh ki long u Kawsar Mia (40), u Ali Hussain (40), u Md Rafig Miah (28), u Md Jul Miah (30), u Monnan Miah (38), u Rumel Miah (20), u Md Shabaj Miah (24), u Ridial Hussan (19), u Samiya Mia (25 snem) bad uwei ba dang 17 snem ka rta.
Baroh ki dei ki nongshong shnong na Sonamganj district, na Sylheti district, na Tangan district bad na Hobiganj district jong ka Ri Bangladesh.
“La ialam noh ia ki ha khmat ka iingbishar”, la ong u SP.
