Iasoi MoU ka sorkar Meghalaya bad ka Asean One Japan ban plie lad ka ioh kam ia ki khun samla ka jylla

Shillong, Nailur 05: Ka sorkar Meghalaya, lyngba ka Meghalaya State Skill Development Society (MSSDS), kila ia soi ia ka Memorandum of Understanding (MoU) bad ka Asean One Co. Ltd., Japan ha Tokyo hynne ka sngi Thohdieng.

Ka jingmih kane ka jingiasoi ia ka MoU kadei hadien ka jingleit u Myntri Rangbah sha ka ri Japan ha u Iaiong 2025 na ka bynta ban thaw ia ki lad ioh kam ioh jam na ka bynta ki khun samla ka jylla Meghalaya. Kane kadei ka jingsdang na u Myntri Rangbah ban don ka jingiakren bad mynta kane kala wan ban urlong bad poi sha kane ka jingiasoi ia ka MoU.

Kane ka jingiatrei lang kan pynleit jingmut bha ban plie ia ka lad ka lynti ha ka ioh kam ioh jam ha ka liang ka koit ka khiah, IT bad kiwei kiwe de ki liang bad ka Japan ha ka liang ki kam ban trei, kaba ai ia ka jinghikai ban kren ha ka ktien Japan bad kumjuh ruh ha kaba iadei bad ka kolshor. Kan kyrshan ïa ka jinghikai bad ka jingpynrung kam shabar ri ïa ki samla jong ka Meghalaya, ban sdang da ki 500 ngut ki khynnah samla ha ka snem ba nyngkong bad ban kiew sha ki 5,000 ngut ha ki san snem ban wan.

Haba kren ha Indian Embassy ha Tokyo, u Bah Shakliar Warjri, uba dei u myntri sorkar ba peit ia ka tnad Labour, Employment & Skill Development, jong ka sorkar Meghalaya, ula ong “Kane ka MoU kam dei tang ka jingiateh kular-hynrei kadei ka jingplie lad plie lynti ia ki khun samla ban ioh kam shabar ri bad kumjuh ruh ban tip ia ka riti dustur hapdeng ka jylla Meghalaya bad ka ri Japan.”

Na ka liang ka Asean One Japan, kaba la lamkhmat da u Chairman bad CEO u Toshiaki Nishikawa, dang shen ula iakynduh ia u Myntri Rangbah ka ri India u Narendra Modi ha ka por ba long ka 15th India–Japan Annual Summit kaba la long ha Tokyo ha ka 29–30 Nailar 2025, da kaba pynpaw ïa ka jingïahap ia kane ka jingthmu bad ka jingthmu jong u Myntri Rangbahduh ban pynlong ïa ka India kum ka Global Skill Hub.

Kane ka jingiateh kular ba kongsan ka pyni ia ka jingkular lang jong ka Sorkar Meghalaya bad ka Asean One Japan ban shim ia ki sienjam, kiba lah ban neh na ka bynta ka ioh kam ioh jam ha ka pyrthei—bad ruh ban ai bor ia ki samla, bad ban pynkhlain ia ka jingiatreilang hapdeng ka India bad ka Japan.