SHILLONG, Nailur 5: Ka BJP Meghalaya State Unit kala ai khublei ia u Myntri Rangbah duh ka ri u Narendra Modi bad ia ka Finance Minister ka Nirmala Sitharaman halor ka jingpynkylla thymmai ia ka jinglum khajna ka GST.
Ka BJP Meghalaya kala pynpaw ia ka jingkmen halor ka jingïohi jngai jong ka sorkar kmie ban pynbha ïa ka jingim jong ki paidbah khamtam kiba duk ba shitom.
Haba kren sha ki lad pathai khubor, u General Secretary ka party ha ka jylla, u Bah Wankitbok Pohshna u ong, “Ka GST ba thymmai kan pynhiar dor ia ki marbam mardih, ka koit ka khiah, ka pule puthi bad ka kit ka bah. Kane kan pynsuk ïa ka jingim kaba man ka sngi, bad kan ai pisa ha kti ki paidbah, kan pynkhlaiñ ïa ki nongseng kam lajong, bad kan kyntiew ïa ka ïohkam ïohjam.
“Ha ki por mynshwa, ki marbam ba kongsan ruh ki hap ha ka khajna kaba heh. Hynrei mynta, bun ki marbam ba kongsan kin nym shah oh khajna, bad tang katto katne kin hap hapoh ka thup khajna ba 5%. Yn nym don khajna shuh ia ka dud, kaba long kaba donkam bha ïa ki kynnah. Ki marbam kum ka makhon, ka ghee, ka jam ki la hiar na 12% sha 5%. U ice cream uba ju ngat ha ka GST ba 18% la pynhiar sha 5%. Ki chocolate kiba hap hapoh ka khajna ba 31% mynshwa la pynhiar hiar noh sha ka 5%” ong u Bah Pohshna.
Shuh shuh u la ong, Ki tiar shet jingbam kum ka tableware bad cookware kiba la don 28% khajna mynshwa, mynta kin long tang 5%. Ha ka jingïarap ba kyrpang ïa ka North East, ka kharkhana sha da ki siej ne bamboo furniture ruh la pynhiar sha 5%, kaba ai jingïarap ïa ki nongsengkam kane ka thaiñ.
Ki tiar dawai kum ka anaesthetic, medical oxygen, iodine, diagnostic kits, blood glucose monitor, surgical gloves, bandage, bad corrective spectacles ki la hiar na 12% sha ka 5%. Ki dawai ba ju pyndonkam ha ka Ayurvedic, Unani, Siddha bad Homoeopathic ruh ki la hiar sha 5%. Ka X-ray, radiotherapy, surgery bad ki test ki la hiar sha ka 5% bad kine baroh kin kyntiew ia ka koit ka khiah.
Ha ka por ba ki ri kum ka America ki ïakynduh jingeh na ka inflation, ka India ka la ïoh ban pynkylla ïa kane da ka jingïalam ba iohi jngai jong u Myntri Rangbah duh bad ka kynhun jong u bad kine ki jingkylla baroh kin wanrah ia ka jingim babha bad kaba lah ban kynshew pisa ha ki snem ban wan ong u Bah Pohshna.
