Shillong, Nailur 04: Ka Wildlife Institute of India ka la tyrwa ia ki Jingkieng Jri lane ki Living Roots Bridges jong ka Meghalaya ban ioh ia ka khusnam jong ka UNESCO-Greece Melina Mercouri International Prize kum ka jingithuh iaka jingsumar bad jinglah pyniaid ia ki jaka bad ka kolshor.
Haka jingkhmih jong ka Meghalaya Basin Management Agency ryngkat bad ka Syrwet U Barim Mariang Jingkieng Jri Cooperative Federation Ltd, ka jingpynneh iaka riti dustur ka kynthup ïa ki 74 tylli ki shnong ha ri-lum Khasi bad Jaiñtia jong ka Jylla Meghalaya, kiba long ka pateng kaba im ha ka jingïadei jong ka kolshor bad ka mariang bym lah ban pynïakhlad.
Ka Jingkieng Jri, ka rukom shna Jingkieng kaba im, kaba shna da ki jaidbynriew Khasi-Jaiñtia kala neh mynta la palat ar hajar snem, ka dei ka jingthaw kaba nangroi nangsan kaba long kongsan bha ha ka mariang.
Ka Wildlife Institute of India ka dei ka nodal national agency na ka bynta ka jingwad bniah bad jinghikai ha ka liang ka jingpynneh pynsah ia ki mrad khlaw bad ka mei mairang.
“Da tynrai u dieng Ficus elastic (Jri), kine ki jingtei-ki jingkieng, ki pyrnon, ki mawkyndon bad ki rukom pynduna ia ka jingtwa khyndew- ki nangroi beit, kaba pynlong ia ka rukom pynroi jong ki ban ym lah ban pyniakhlad na ka jingdon jong ki” la ong ka WII. Nalor ba ki don ka bynta kaba kongsan ha ka imlang sahlang hapoh kawei pa kawei ka shnong, ki jingtei ba la pynshong nongrim ha u Ficus ki iarap ruh ia ka mariang lyngba ka jingpynbha ia ki khlaw bad ki rud wah. Ki trai ri trai muluk, kynthup ia ki nongrep bad ki nongleit lyngkha, ki dang iai bteng ban pyndonkam bad pynroi ia kine ki jingtei, da kaba pynskhem ia ka mynsiem bad ka rukom thain Jingkieng ba phylla jong ki riew tymmen jong ki, kiba la leit noh.
“Ka jingpynrung kyrteng da ka WII-C2C ka lah ban long kum ka sienjam kaba kongsan ban pynbiang ia kane ka rukom, ka kolshor kaba ryntih, kaba la pyndap da ka jinglong tynrai .Ka jingnang jingstad, ka jingïaroh ha ka pyrthei kaba ka dei hok ban ïoh” kala ong.
Ka Wildlife Institute of India – Category 2 Centre (WII-C2C) ka dei ka Shlem ba kyrpang ba la seng hapoh ka jingpeit jong ka UNESCO ban kyrshan ïa ka jingpynneh pynsah bad jingpynïaid ïa ki jaka ba pawnam jong ka pyrthei ha ka thaiñ Asia-Pacific.
Ka Jingkieng Jri ka la don lypa ha ka thup jong ka jingïalang jong ka pyrthei haka ba ka Myntri ka tnat pla tyngka jong ka Sorkar Pdeng ka Nirmala Sitharaman ka la kyrshan ruh ia ka jingkwah jong ka Meghalaya ban ioh ia ka jingithuh jong ka UNESCO ia ki jingkieng jri.
Ka khusnam UNESCO-Greece Melina Mercouri International Prize kadei naka bynta ban ka jingsumar bad jingpyniaid ia ki jaka puta jong ka kolshor ka burom ia ki jingiadei kiba jylliew kiba ki jaidbynriew ki la thaw bad ki sawdong sawkun jong ki bad ka pynshlur ia ki jingpyrshang kiba kham bniah ha ka jingtip, jingtreikam, bad jingwad bniah kiba donkam ban iada ia kine ki jaka puta.
Ka Khusnam ka kynthup ïa ka jingai jingïarap kaba US$30,000 bad ka pynksan ïa ka bynta kaba kongsan jong ka jingpynneh pynsah ïa ka kolshor ha kaba ïada ïa ka pateng ba la ïasam lang katba ka ai mynsiem ïa ki kam ha ka lawei bad ia kane ka khusnam la sam man la ka ar snem.
La seng iaka khusnam ha u snem 1995 kum ka jingburom ia ka nongak phlim ba pawnam jong ka ri Greece bad ka Myntri jong ka tnat Culture ka Melina Mercouri, kane ka khusnam ka la ithuh ia ki jingpyrshang ba pawnam ban pynneh pynsah ia ka mariang la palat arphew snem, kaba kyntiew ia ka jingpyniaid ba neh jong ki jaka ba don ka kolshor katkum United Nations’ 2030 Agenda for Sustainable Development.
Ka khusnam UNESCO-Greece Melina Mercouri International Prize la thaw ha u snem 1995 ban ai khusnam ia ki nuksa ba pawnam jong ka jingtreikam ban iada bad pynbha ia ki jaka puta jong ka kolshor jong ka pyrthei.
