Dawa ka NPYF ia u samla pule doktor ban pan map na u CM, Sengbhalang bad ki riew rangbah

Shillong, Nailur 03 : Ka National People’s Youth Front (NPYF) kala dawa ia uwei u samla pule doktor ba un panmap khlem kyndon ia u Myntri Rangbah ka Jylla Conrad K Sangma, ki riew rangbah bad ki Sengbhalang namar ka jingkren “ khlem burom lang” ha ka jingialang dang shen ha Tura Circuit, kaba iakren halor ki jingeh kam pisa ka GHADC bad ka Tura Medical College.

Ka jingialang ka dei kaba la pynlong da ka jingthmu ban bishar bniah ia ki jingiohnong bad jingduhnong haba pyntreikam ia ka Public-Private Partnership na ka bynta ka Tura Medical College.

Ka jingiakren ka dei kaba seisoh, bad ki nongiashimbynta kila ai ia ki jingai jingmut kiba tei. Hynrei, ka jingleh jong uwei u samla pule doktor ha kane ka jingialang kala khring ia ka jingpynrem.

Kat kum ka jingong u Working President ka NPYF Anclusis M Marak, uwei u samla pule ula pyni ia ka jingbym don jingtip, pyni ia ka jinglong rangbah bad bym don ka akor ka burom, khlem da lah pynpaw iaki jingsngew ba u don da ka lynti kaba don burom.

“Ka rukom leh jong u ym tang ba kam iahap bad bym don burom hynrei kam iahap ruh kum u samla pule, khamtam u briew uba leit pule doktor. Ka paw ba une u briew u don da ka jingthmu ha lyndet lane pynshit da ki riewkhwan shimet ban pyniashrut bad pynthut ia kane ka jingialang” ula ong.

“Ka NPYF ka dawa ia une u briew ba un panmap khlem ka jingbuh kyndon ia u Myntri Rangbah ka Jylla, ia ki riew rangbah ba don burom bad ia ki Sengbhalang kiba iadonlang” ong u Marak.

Ula maham ruh ba kino kino ki jingpyrshang ban pynjah burom ia ka Ophis u Myntri Rangbah lane kren bein ia ki riew rangbah bad ki nongialam shnong, ki dei ki bym lah ban pdiang bad bym lah ban shah.

Ka NPYF kala kyntu ruh ia baroh ki kynhun khamtam ki samla ba kin iashimbynta ha ki rynsan jingiakren, iatai da ka lynti synshar paidbah bad ba don burom, da kaba bat ia ki jinglong jong ka jinglong babha, ka jingsngew rit, bad ka jingiatreilang kaba tei.