Shillong, Nailur 02 : Ka Federation of Adhoc School Teachers of Meghalaya (FASTOM) kala pynbna ia ka rai ban mih sha surok ban iakhih pyrshah ia ka jingkynnoh bymlah ka Sorkar ban kyntiew ia ka tulop ki nonghikai Adhoc ha ka Jylla.
Haba kren sha ki lad pathai khubor ha ka sngi Ba-ar, u Vice President ka FASTOM, S Jungai ula ong ba ka Federation kala rai ban pynlong ia ka General meeting ha ka 13 tarik Nailur ha Tura, West Garo Hills, ban rai khatduh ia ki lynti jingiakhih. Ia ki jingiakhih yn pynlong lang ha kajuh ka por ha Shillong bad Tura.
Ula ong ba ka FASTOM kala dawa ia ka jingsiew ba kham bha bad ki jingmyntoi na ka bynta ki nong hikaiadhoc, kynthup ka jingkyntiew kyrdan sha ka deficit system, 5^ ka increment man u snem, ka jing pynjlan ia ka rta shongthait na ka 60 sha ka 65 snem, ka shithi pynkynmaw kaba la aiti sha u Myntri ka tnad pule puthi Rakkam A Sangma ha ka 17 tarik Lber, 2023.
Kat kum ka jingong u Bah Jungai, ka tulop ba ki nonghikai adhoc ki ioh mynta ka long T.18,000 ia ki lower primary, T.22000 ia ki upper primary, T.29000 ia ki secondary, T.31,000 ia ki nonghikai science bad T.33,000 ia ki higher secondary.
Haba pynpaw ia ka jingbym sngewtynnad halor ka kaiphod ka Meghalaya State Education Commission, une u nongialam ka FASTOM ula ong “Ngi don ka jingkyrmen ba ka State Education Commission, bala thung ha u Naitung 2023, kan pynbeit ia ki jingeh ba iakynduh daki nonghikai adhoc. Hynrei, ka kaiphod ba khatduh bala aiti sha ka Sorkar kam shym la kynthup ia kano kano ka jingai jingmut ban siew kham bha sha ki nonghikai adhoc”.
“Nalor kane, ka Federation kala aiti ruh ia bun ki dorkhas sha u Myntri Rangbah, Symbud Myntri Rangbah, Myntri ka tnad pule puthi bad sha ki Ophisar ka tnad pule puthi, hynrei ki jingdawa jong ki, kim pat shym la treikam” ula bynrap.
U pyntip ba ka jingpynkiew tulop ba khatduh ka long ha u snem 2022, hadien ka jingiakhih hynrei kane kam pat biang satia ban weng ia ki jingeh ha ka pisa tyngka jong ki nonghikai adhoc namar ka jingkiew dor ki mar ki mata.
“Ngi shem ia ka jingeh kaba khraw ban pynioh ia ka pule dangle kaba bha iala ki khun bad ki lad jing sumar iala ki bahaiing hasem” ong u Bah Jungai.
Kat kum ka jingong jong u, ka por kala dei ia ki nonghikai adhoc ba kin iatylli bad leh eiei halor ki jingdawa iala ki jong ki hok.
 kala pynbna ia ka rai ban mih sha surok ban iakhih pyrshah ia ka jingkynnoh bymlah ka Sorkar ban kyntiew ia ka tulop ki nonghikai Adhoc ha ka Jylla.){kind=link}