Rai kynshew ka Sorkar palat T. 6 klur ban phah pule Hotel Management ia ki samla pule

Shillong, Nailur 02 : Ka Sorkar Meghalaya Democratic Alliance (MDA) ba ialam ka National People’s Party (NPP) kan kynshew T.6.6 klur ban kyrshan ia 165 ngut ki samla pule ba kin leit pule B.Sc ha ka Hospitality bad Hotel Management ha kine ki san snem ban wan.

Ia kane la pynbna da u Myntri kam Jngohkai Bah Paul Lyngdoh ha ka jingpyllait ia ka Chief Minister Hospitality Scholarship Programme (CMHSP) ha ka sngi Ba-ar.

U Bah Paul ula ong ba ka thong jong kane ka scholarship programme ka long ban pynshlur ia ka jingleit pule ia ki kyrdan ba halor ha ka hospitality, ban btin lynti bad saindur ia ki samla ba kin ioh ia ki lad treikam ha kylleng ki ri ka pyrthei bad ban pynkhlain ia ka jingdon ki nongtrei bat bit ka Jylla ha ka Hospitality.

“Kan dei ka jingkyrshan bai klas ba 100 % ia ki samla pule ba leit pule B.Sc ha ka hospitality bad hotel management ha IHM, Shillong” ula ong ba ka Sorkar kan kyrshan ia 165 ngut ki samla pule ha kine ki san snem ban wan, kaba long 55 nut ki samla pule (na man kawei ka block) ki ban ioh ia ka scholarship ha ki lai tylli ki batch.

U iathuh ba ki samla pule ki dei ban dei ki nongshongshnong ba pura ka Meghalaya, kiba la pass ia ka klas XII ba kynthup ia ka English kum ka sobjek bad kaba ka jingioh kamai ka Longiing ha ka shisnem ka long hapoh T.3 lak. Kan ym don satia ka jingpyrrkhing ia ka rta.

Ka jingjied ia ki samla pule kan long kat kum ka jinglah jong ki bad ka jingkwah jong ki, ia kaba ka jing jied ba khatduh yn leh da ka State Level Selection Committee.

“I aka bai klas yn siew da ka Sorkar Meghalaya ha kaba ka jingkynshew pisa baroh lang ban kyrshan ia ki 165 ngut ki samla pule ha ki san snem kan long T. 6.6 klur. Kane ka mut ba ngin kynshew kumba T.3.6 lak ia uwei pa uwei u samla pule” ong u Bah Paul.

Kat kum ka jingong jong u, ki samla pule kin hap ban pynlut hi nalade tang ia ka bai hostel, ka bam, ka uniform bad kiwei kiwei ki jingdonkam.