Guwahati, Nailur 2: Ka Gauhati Medical College and Hospital (GMCH) kala sospon ne weng kam noh shipor ia kiba bun ki Doctor bad ki nongtrei hadien ka jingjia ba sngewsih ha u bnai ba la dep ïa ki khyllung ba dang kha ha Neonatal Intensive Care Unit (NICU), ha kaba lai ngut ki khyllung ba dang kha ki la mynsaw jur bad uwei u la khlad noh.
Da kaba leh katkum ka jinglap jong ka jingtohkit hapoh jong ka hospital, ka hospital ka la sospon khlem buh por ia ka Dr. Anupama Deka, Head of Paediatrics, bad u Associate Professor Dr. Dipankar Hazarika uba dei na kajuh ka department. Ia baroh ar ngut ki doctor la bthah ba kin don beit hapoh Guwahati ha ka por ba shah sospon bad la khang ïa ki ban trei kam shimet ne ban trei ïa kino kino ki kam haduh ban da pynbna da kumwei pat.
Shuh shuh ki bor ba dei peit jong ka hospital kila sospon ruh ia ka Gomati Devi kadei ka Nurse In-Charge, ka staff nurse ka Chandana Nath bad ia u Ishan Jyoti Talukdar uba dei u technician ICU. Nalor kata, hadien ka jingujor na ki bahaïing jong ki khyllung ba shah ktah, ka GMCH ka la pynjari ïa ka jingshah sospon kaba hynriew bnai ïa u Dr. Hrishikesh Thakuria bad ïa ka Dr. Puja.
Kane ka jingjia ka la jia ha ka Ward No. 3 jong ka Labour and Delivery Unit, ha kaba la kynnoh ba saw ngut ki khyllung ba dang shu kha la buh ha kawei ka jingthiah ICU. Lai ngut na ki, ki la mynsaw ha ki bynta jong ka khlieh hadien ba la iathuh ba ki la hap, katba uwei pat u khyllung, u la khlad noh.
Kiba ha iing ki la kynnoh ïa ka hospital ba ka la khapngiah palat ha ka NICU, ha kaba saw haduh san ngut ki khyllung la shu pynthiah ha kajuh ka jingthiah ne ka ICU box.Ki la kynnoh ruh ïa ka jingbym shimkhia, da kaba kdew ïa ka jingleh bym suidniew jong ki nongtrei bad ki kyndon jingïada ki bym biang.
Halor kane ka jingjia, ka la pynmih ka jingbitar paidbah, kaba la pynlong ïa u Myntri Rangbah ka Assam u Himanta Biswa Sarma ban tuklar. La kem kham mynshwa ia kawei ka nurse kaba don ha ka duty ha kaba iadei bad katei ka jingjia.
 kala sospon ne weng kam noh shipor ia kiba bun ki Doctor bad ki nongtrei hadien ka jingjia ba sngewsih ha u bnai ba la dep ïa ki khyllung ba dang kha ha Neonatal Intensive Care Unit (NICU), ha kaba lai ngut ki khyllung ba dang kha ki la mynsaw jur bad uwei u la khlad noh.){kind=link}