Shillong Nailar 29: U Commissioner & Secretary uba khmih ia ka tnad Bording u Sanjay Goyal ula ong, ba ka tnad ka dang wad ia ki lad ki lynti ban sdang ia ka Renewable Energy, kynthup ka Solar bad Hydro Projects ban kyntiew ia ka jingpynmih bording elektrik hapoh ka jylla.
“Ia ka Detailed Project Report (DPR) jongka Leshka project phase-II kadei kaba la iaid shakhmat ha ka jingpynkhreh bad ka dang shu sda” ong u Goyal haba iakren bad ki nongthoh khubor ha ka sngi Thohdieng haba bynrap ba ka Ganol Power Project kadei kaba la kynthup lang ha kine ki 2 snem kiba la dep.
“Ka tnad ka dang treikam bad ki kynhun shimet ban tei ia ki Hydro Projects, kiban ai jingmyntoi ia ka jylla ha kaba yn ioh ei ia ka bording haduh 13%” ula ong.
U Goyal ula pynthikna ba ka jylla kala bud iaka Resource Adequacy Plan kaba la pynkhreh da ka Central Electricity Authority (CEA).
“Ngi la iaid katkum katei ka plan kaba la pynwandur da ka CEA na ka bynta ka jong ngi bad ngi dang wad ia ki lad ki lynti ban treikam halor kane ka bynta”.
U Goyal ula ong ba kam don kano kano ka jingduna ka bording elektrik ha Meghalaya bad ka jylla ka dang trei bad iaid shakhmat ha kaban pynbiang ia ka bording ba 24 kynta sha ki nongpyndonkam bording.
“Ngi long kiba biang bad ngi lah khmih bniah ia ka rukom pyniaid ia ka bording ha ka lynti kaba shemphang bad dei da kane ka lynti ba ngim shym la donkam ban pyntreikam ia ka jingpynlip bording ne ka loadshedding,” ula ong.
U Goyal ula ong ba ka jingthud ka bording elektrik kadei namar ka jingpynkhyllem ia ki dieng bad ka jinghap ki tnad dieng ha ka por slap, kaba la pynjulor ia ki post elektrik bad ia ki sainar.
Ula ong shuh shuh ba ka tnad Bording kala shim ia ki sienjam ban pynbha shuh shuh ia ki jingtei kaba kynthup ia ka jingbujli noh ia ki post elektrik kiba la sarang, ban bujli thymmai ia ki Transformer bad pyndait ia ki Conductor kiba la sop bha nalor ka jingpynbun ia ki Sub Stations ban pynduna ia ka jingthud ka bording.
