Guwahati, Jylliew 15 : Ka tnat criminal investigation department (CID) ki pulit Assam ka la kem noh ia uwei u briew halor ka jingkynnoh ba u la kam thok ia lade kum u inspector jong ka tnat crime branch.
Une u briew ia u ba la tip kyrteng kum u Upendra Pandey la kynnoh ruh ba u la dawa pisa na ki suba bad ki briew ki ba la shah kynnoh donkti ha ki ba bun ki kam bymman da ka jingkular ban iarap ia ki da ka ba iakren bad khroh ia ki heh ophisar CID jong ka tnat pulit ka Assam.
Ha ka jingtohkit la lap ba une u briew u dei tynrai na ka jylla Uttar Pradesh, bad mynta u shong u sah ha ki bynta jong ka Beltola ha ka nongbah Guwahati.
Ha kawei pat ka bynta la pynngat ia une u briew hapoh ki kyndon ain section 120 (B), 419, 420, 388 jong ka Indian Penal Code (IPC) da ka tnat CID ka Assam.Na ka liang ka iingbishar ka la phah set ia une u ba la shah kynnoh donkti ha ka jingkhmih jong u magistrate tad haduh ban da pynlong shuh shuh ia ka jingtohkit.
