Shillong, Nailar 26 : Ka Sorkar Jylla kala rai ban pynlong da ka eksam bad ka interview ban thungkam pura ia ki nongtrei adhoc bala thungkam hadien ka 31 tarik Nohprah, 2007.
Hadien ba dep pyniaid ia ka jingialang ka Kynhun Myntri ha ka sngi Ba-ar, u Myntri Rangbah Conrad K Sangma ula pynbna ba ka Sorkar kan buh kumba 1500 tylli ki kam ba thylli, ki ban thung lyngba kane ka jingjied.
Ha ki snem bala leit, ka Sorkar kala thungkam pura ia ki nongtrei ba thung adhoc, kiba la iohkam hashuwa ka 31 tarik Nohprah, 2007, kaba ktah ia kumba 3000 ngut ki briew, kat kum ka hukum jong ka Iingkashari Supreme Court.
“Mynta hadien u 2007, ki dang don ki nongtrei ba shut hung adhoc bad kumta ka jingkylli ka mih ba ka Sorkar kan leh kumno ia ki. Mynta, ka Iingkashari Supreme Court kam shym la ailad ia ngi ban iaid shakhmat bad shu thungkam pura beit beit ia kine ki briew. Kumta, ka Sorkar ka hap ban iaid da ka lynti ban pynlong da ka eksam bad interview….lada phim thungkam pura ia kine ki kam, lada shu iakren….kine ki kam kin long thylli noh watla ki don ki nongtrei adhoc. Kumta, ngi la shim ia ka rai ba baroh kine ki kam ba lait yn sa thung pyndap noh” ong u Conrad haba iakren bad ki nongthoh khubor.
U Myntri Rangbah ula pynbna ba ka Sorkar kan sa ailad da kaba pynjynsur ia ka rta iohkam ia ki nongtrei adhoc kiba la trei la 10-15 snem, khnang ba kin ioh iakhun ia ka eksam.
“Ka Kynhun Myntri kala mynjur ruh ia ka SOP na ka bynta ki eksam bad interview, ba kynthup ia ka kyndon ban ailad ia ka rta iohkam ia ki kyrtong kiba dei hok ban ioh” ula ong.
Kat kum ka jingong jong u, ka Sorkar ka thmu ban ailad kaba long kumjuh ia baroh ki nongtrei adhoc ba kin iakhun ia ka eksam na ka bynta kine ki kam, haba pynthikna ba kin ym shah ktah namar ka rta lane kino kino ki daw.
