Shillong, Nailar 25 : Ka Meghalaya State Planning Board (MSPB) kala pynkhreh ban aiti ia ki jingai jingmut ba bniah sha ka Sorkar Jylla ban pynheh ia ki surok ba don lypa, ban shna thymmai ruh ia ki surok nalor kiwei kiwei ki lad ki lynti ban weng ia ki jingeh ha ka dheng kali ha Nongbah Shillong.
Ia kane la pyntip da u Chairman ka Board Bah Metbah Lyngdoh hadien ka jingleit jurip ia katto katne ki jaka ha nongbah ha ka sngi Nyngkong. La synran ia u da u Rangbah Shnong ka Lumbatngen, Sawlad bad Lapalang.
Haba kren sha ki lad pathai khubor, u Bah Metbah ula ong ba ka Sorkar kala shim ia ki lad ki lynti ban leh eiei halor ki jing sngewkhia u paidbah ia ka jingkhapngiah ka leit ka wan ki kali ha Shillong.
“Ngin sa aiti shen ia ka kaiphod ban ai jingmut sha ka Sorkar Jylla ba kan shim ia ka sienjam ha kaban pynheh ia ki surok ba la don lypa bad shna ruh ia ki surok thymmai ban weng noh ia ka jingdheng kali” ula bynrap.
U Bah Metbah ula pyntip ba ha ka jingjurip, ka Board kala ithuh ia ka lad Sawlad sha Lapalang bad Lumbatngen bad kumjuh ruh ia ka surok najan ka Assam Regiment ki dei kiba kongsan bha ban pynbha, da ki plan ban pynheh ia ka surok bala don mynta bad shna ruh ia ka surok thymmai ban pynduna ia ka jingkhapngiah.
“Ka Board kala shem ba ka don ka jaka ki shipai bad kito kiba dei jong ki riew shimet. Ngi la rai ban shong bishar ia kane ka kam bad ngin sa phah ia ki jingai jingmut sha ka Sorkar Jylla (ban wad lad ha kaban thied ia kine ki jaka na ka bynta ban pynheh ia kine ki surok)” ong u Chairman haba ban jur ia ka jingdonkam ka jingkyrshan bad jingtreikam jong baroh ki kynhun ban lah tem ia ka jingkhapngiah ka leit ka wan ki kali.
U Bah Metbah ula pyntip ruh ba ka Board kala ithuh ruh ia ka surok Umpling-Dongsharum. Kane ka dei kawei par ka surok kaba kongsan ban pynduna ia ka jingdheng kali ha ki thain Rynjah, bad kan pyniasoh ruh ia ki lad ba kongsan na MeS sha Demseiniong bad na Iew Rynjah sha Nongrim Hills.
“Ngin sa shong bishar ia kane hadien ka jingiasyllok bad ka PWD bad ngin sa ai pat ia ki jingai jingmut sha ka Sorkar Jylla” ula ong.
Kat kum ka jingong jong u, ka jingdheng kali ha Shillong ka dei ka kam ba sngewkhia la slem bha namar ka jingrit ki surok bad ka jingnang bun ki kali, kaba la nang kynton ia ka jingeh bad pynsahkut ia ki briew ha ka dheng kali ba da ki kynta kynta.
Ka Board kala leit jurip ruh ia kiwei ki surok, kiba lah ban iarap ha kaban pynduna ia ka jingdheng kali ha Shillong.
 kala pynkhreh ban aiti ia ki jingai jingmut ba bniah sha ka Sorkar Jylla ban pynheh ia ki surok ba don lypa, ban shna thymmai ruh ia ki surok nalor kiwei kiwei ki lad ki lynti ban weng ia ki jingeh ha ka dheng kali ha Nongbah Shillong.){kind=link}