Shillong Nailar 21: Ha ka jingiakhun pyrshah ia ki jingdih kiba sniew. Ki pulit ka jylla kila ioh kurup ia u droks uba shongdor palat T.400 Klur bad kem ia ki 1061 ngut ki riewshimet kiba donkti ha kaban die be-ain ha kine ki 5 snem kiba la dep.
“Ka jingioh kurup baroh ka shongdor palat ia ka T.412 Klur, ia kaba haduh mynta ngi lah dep ban thang noh shiteng hapoh ka karkhana jongka Star Cement ha East Jaintia Hills. 1061 ngut ki briew kila shah kem ha kine ki 5 snem kiba la dep” la ong u Superintendent of Police (SP) jongka Anti-Narcotic Task Force (ANTF) u Giri Prasad haba iakren bad ki nongthoh khubor ha ka sngi Palei.
Ki jingdih pynbuaid kiba la ioh kurup ki kynthup 41,000 gram u Heroin, 12716 Kg u Ganja, 2 kg u Opium, 76 kg ki Yaba Tablets, 14 kg u Crystal Meth, 16 kg kiwei pat ki jingdih pynbuaid, 1.74 lak bilor ka Codeine Cough Syrup kiba la ioh kurup hapoh ka jylla.
U Prasad ula pynpaw ba kala don ka jingkiew ha ki jingjia jongka jingkhaii ia u droks ha ka jylla naduh u snem 2023 haduh u 2025 bad la jan don kumba 100 ngut kiba la shah kem tang mynta u snem.
Katkum ka jingong u SP ka ANTF, ki don ar jait ki rukom khaii, ka jingdie sha ki nongdih da kaba khring ia ki samla ka jylla bad ka jingkhaii na kawei ka jylla sha kawei pat, ia kaba la khaii ia u droks lyngba ka jylla sha kiwei pat ki jylla.
Ula phla ba dei namar ka jingpynjur ia ka jingkhynra bad jingkhmih bniah, kila don katto katne ki nongkhaii kiba la sdang wad da kiwei pat ki lad ki lynti ban ioh khaii sha kiwei pat ki jylla.
“Kitei ki jait jingjia kila nang kiew bad ngi la lah ban long kiba seisoh ha kitei ki jingkurup ha kine ki khyndiat snem” la ong u Prasad.
Ka ANTF kala pynleit jingmut bha ha ki jaka rung abd ki jaka mih (entry & exit point), khamtam ha Ri Bhoi bad East Jaintia Hills districts, ha kaba bun bah u droks la khaii shapoh ka jylla.
“Kila don ki district ANTF ha man la ki district hynrei ha Ri Bhoi bad East Jaintia namar ba kidei ki jaka rung bad jaka mih na ka bynta ka surokbah, kumta ka long kaba don jingma na ka jingkhaii ia u droks. Ngi lah iatreilang ryngkat bad ki ANTF ha ki district bapher. Lada phi peit ia ka jingioh kurup ha kine ki por kiba khyndiat, ngi lah pynleit jingmut ha ki jaka rung bad jaka mih namar ba ka jingkurup u droks ha kitei ki district kala jur bha” ong u Prasad.
Ula bynrap ba dang shen la ioh kurup ia ki jingdih kiba sniew kiba shongdor T.4 Klur tang ha ka shi sngi, kadei lyngba ka jingkhynra kaba la pynlong hapdeng ka ANTF bad ki pulit jongka East Jaintia Hills district.
Ka ANTF ka dang khmih lynti ban ioh noh ia ka K9 Unit ha u Naiwieng bad kane kan kyntiew shuh shuh ia ka jinglah ka jongki ban lap ia ki jingdih pynbuaid.
