Guwahati, Nailar 19: U Myntri Rangbah ka jylla Assam Himanta Biswa Sarma u la pynpaw ka jingsngewsih ha ryngkat bad ka jingbitar, ia kaba u la khot ba kadei ka jingleh torti kaba palat pud halor ka jingkhlad noh u khyllung ba dang 15 sngi ba shah sumar ha Neonatal Intensive Care Unit (NICU) jong ka GMCH.
U Myntri Rangbah ka Assam u Himanta Biswa Sarma u la leit ban sha katei ka hospital ha ka janmiet jong ka sngi Nyngkong ban buddien halor katei ka jingjia ia i kkhyllung.
“Watla la don ki tiar kiba biang bad duna ki nongpang mynta ka sngi, hynrei la buh ia lai ngut ki khyllung ha kawei ka jingthiah.Kane ka dei ka jingbym shimkhia kaba ym lah ban pdiang”, la ong u Sarma, da kaba bthah ia ka jingkitkhlieh mardor.
U myntri rangbah u la pynbna ban thaw ia ka kynhun tohkit kaba don lai ngut ki dkhot kiba kynthup ia ki doktor ba rangbah ban bishar bniah ia ki dur khih na CCTV, ban kylli jingkylli ia ki nongtrei hospital, bad ban aiti ia ki jinglap hapoh lai ne saw sngi.
Ia ka nurse kaba don ha ka duty la dep ban susspon na ka kam katba dang ap ia ka jingtohkit. U la hukum ruh ia ki bor pyniaid jong ka hospital ban pynmih ia ka jingpan map kaba pura sha katei ka longiing kaba la duh noh ia i khyllung
Shuh shuh u Sarma u la ban jur ba ka jingbun briew palat kam lah ban long kum ka daw na ka bynta ka jingjia ba sngewsih. “Ka Assam mynta ka don 14 tylli ki Medical College kiba biang ki jingtei bad ki nongtrei.Ngim lah ban ailad ba kum kine ki jingbakla kin jia”, u la ong haba pynpaw ïa ki jingthmu ban wanrah ïa ki Standard Operating Procedures (SOPs) ha baroh ki Medical College ka jylla ban ïada na ka jingkhapngiah palat ki khyllung ba dang kha ha ki jaka thiah ICU bad ban pynkhlain ïa ka jingshngain ha ki jaka sumar.
Kane ka jingjia ka la jia ha ka por 5:30 baje mynstep jong ka sngi Nyngkong, ha kaba ki nongtrei ki la lap ba arngut ki khyllung ki la hap na jingthiah jong ki ha ka por ba ki ju leh ia ki jingpeit bniah ne (routine checks). Uwei na ki — u khunlung ba la kha da ka Smita Deka na Noonmati bad uba la shah sumar na ka jingpang jaundice — la lap ba u la sahkut ha ka jingthiah phototherapy bad ym shym la lah ban pynim pat wat la ki doktor ki la pyrshang mardor.
U Principal jong ka GMCH u Dr Achyut Chandra Baishya haba ïakren bad ki nongthoh khubor u la ong, “Ïa une u khunlung la kha 15 sngi mynshwa bad u don hapoh ka jingsumar da ka phototherapy na ka bynta ka jingpang jaundice.Kumba ha ka por 5.30 mynstep ka kmie kala pyntip ba u khyllung u la hap na jingthiah.Mar mar ngi la ialeh bad pyrshang ban pyllait im hynrei ngim shym la lah shuh ban iarap ia u. Namar ba ngam shym la don ha ka por ba hap na jngthiah ngan ym lah ban kynthoh shuh shuh, bad ngam pat ju bna ban don kim kine ki jait case ha ki por ba mynhswa bad la thaw ia ka kynhun tohkit halor kane ka jingjia.”
Shuh shuh u la pyntip ba ki don haduh 21 ngut ki khyllung kiba shah sumar ha NICU ha kajuh ka por. “Ka hospital jong ngi kaba pynkha khyllung kumba 700 ngut ha ka shi bnai, bad kum kane ka jingjia ka long kaba duna bha bad kaba ym pat ju jia” u la ong.
U wei na kiba sakhi u la ong, “Nga ioh sngew ba u khyllung u la sahkut ha jingthiah, ki doktor ki la dei ban kham husiar bha ha ka por miet.”
Ki bor pyniaid jong ka hospital ki la pynthikna ban leh tyngeh katkum ki jinglap jong ka jingtohkit.
 jong ka GMCH.){kind=link}