Shillong, Nailar 13 : Ka Sorkar Jylla kala dep pyntip sha ka Ministry of Home Affairs (MHA) bad sha ka Tnad Intelligence Bureau (IB) halor ka jingwan pyntriem ki runar Bangladesh dang shen ha ka shnong khappud ka South West Khasi Hills.
“Ngi la pyntip ia kaei kaba jia ha khappud SWKH sha ka MHA bad ka IB” iathuh u Myntri Rangbah ka Jylla Conrad K Sangma haba iakren bad ka Shlem.
Kat kum ka jingong jong u, ha ka jingtohkit la shem ba kine ki nong Bangladesh kiba wan thombor ki dei tang ka kynhun ki runar kiba thmu ban leh ia ki kam rahbor, bad kam shym paw satia kano kano ka dak ba ka don ka jingiadei bad ki bor ka Sorkar Bangladesh.
“Hynrei ka jingtohkit ka dang iaid shakhmat mynta ban ioh ia ki jingtip ba thikna khamtam hadien ka jingioh kurup ia ka Identity card jong u Pulit ka Bangladesh” ula ong.
U Myntri Rangbah u pyntip ba ki Pulit bad ki BSF kila ioh kem ia bun ngut na ki runar ba donkti bad ka jingthwet ka dang iaid shakhmat sa ia kiwei kiba donkti ha kane ka kam rahbor.
Haba kylli, u Myntri Rangbah ula pyntip ba ka Sorkar Jylla kala pynkhlain ia ka jingbuh ia ki bor pahara ha ki jaka khappud bad ka Bangladesh ban wanrah ia ka jingshngain ia ki nongshongshnong bad ban khanglad syndon ia kum kine ki jingjia ba kin dang jia hadien habud.
U Conrad u iathuh ba kat kum ka jingpyntip ki nongshongshnong ka thain, kitei ki runar hadien ka jingpyntriem, kila pyrshang ban phet krad biang sha Bangladesh da kaba rung sha khlaw hynrei kila jah lynti bad la pynlong ia ki Pulit ban ioh kem da kaba suk.
Ha ka miet 8 tarik Nailar, kumba 8-9 ngut ki runar Bangladesh kila wan rung ha ka shnong Rongdangai bad rahbor ia uwei u samla Garo Balsrang A Marak. Kine ki runar kila pynap da ka pistol bad siat ruh sha suin ban pyntieng hynrei une u samla ula ioh ban phet na kti jong ki.
Ki Pulit bad ki shipai BSF haba ioh jingtip ia kane, kila pynlong ia ka jingkhynra ha ryngkat ka jingiarap ki paidbah, kaba lam sha ka jingiohkem ia 6 ngut ki runar tangba uwei ula khlad noh na ka jingmynsaw hadien ka jingshah bomshnong.
 bad sha ka Tnad Intelligence Bureau (IB) halor ka jingwan pyntriem ki runar Bangladesh dang shen ha ka shnong khappud ka South West Khasi Hills.){kind=link}