Shillong, Nailar 11 : U Myntri ka Tand Animal Husbandry & Veterinary Bah AL Hek ula bthah ia ka Tnad ba kan pynkloi noh ia ki kam ki jam ba iadei bad ka jingbuh ia ki Health Checkup Centre ia ki mrad ba wanrah nabar ka Jylla.
“Ngi la iohpdiang ia ka pisa na ka Sorkar India ban shna ia ka Health Checkup Centre ia ki jingri jingdup ha Narang, Ri-Bhoi bad Nidangpur, Garo Hills” ong u Bah Hek haba iakren bad ki nongthoh khubor hadien ka jingialang bad ka kynhun ka Hynniewtrep Integrated Territorial Organisation (HITO) ha ka sngi Nyngkong.
U Myntri ula kular ba shen yn sa pyntrei noh ia kawei na kine ki centre.
“Nga la dep bthah ia ka Tnad ba lan pynkloi ia ki kam ba iadei bad ka jingtei ia kane ka centre” ula ong haba kubir ba ki nongialam ka HITO bad kiwei ki Seng kila pynsngew ia ka mat kaba dei eh bad ki jingai jingmut ban don ia ki Health Checkup Centre ia ki mrad ba wanrah nabar ka Jylla ban shoh doh ha Jylla.
Haba iadei bad ka jingkhaii tuh ia ki masi, u Bah Hek ula ong ba ka Sorkar kala shimkhia bha ia kane ka kam bad ki BSF lem bad ki Pulit kila iatreilang ban iakem ia ki nongkhaii tuh.
Ula ban jur ba ka Sorkar kan nym ailad ia ka jingkhaii tuh ia kino kino ki jingri jingdup shabar ka Ri.
U Myntri ula kren ruh halor ka kamram jong ki Deputy Commissioner, kiba khlieh ia ka Committee ban khmih ia kane ka kam bad ong ba ki jingtalasi ki ju long man ka por ban khanglad ia ka kam khaii tuh.
Ha ka dorkhas bala aiti sha u Bah Hek,ka HITO kala dawa ban tehlakam ia ka jingkhaii tuh ia ki mrad shoh doh bad ka jingwanrah ia ki mrad ha Jylla kiba la wan rung khlem kyndon.
Kala kdew ba ka jingioh kurup ba manla ka por da ki BSF ka Meghalaya Frontier kala pyni ba ka kam khaii tuh ia ki masi sha Bangladesh kala poi sha u pud uba ima.
Ka syiar bad u sniang ruh la wan khaii tuh sha Jylla lyngba ki lad bapher bapher, bad ka ER 021 ha Byrnihat, Ri-Bhoi ka dei ka lynti rung kaba bun eh.
Haba kdew ba ka Jylla kala duhnong bha haka khajna namar ka jingbym biang ki jingpyrrkhing bad jingpeit pyrman ia ka jingwanrah bad jingpynmih ia ki mrad shoh doh na Jylla, kala kynnoh ba ki jingiohnong na ka jingkhaii tuh kala khring ia kiba bun ki samla ban iehnoh ia ka skul ha ri-Bhoi.
Ka HITO kala dawa ban buh noh ia ka jingpyrrkhing ba 24 kynta shisngi da kaba buh ia ka Check Gate ha ki jaka rung bad jaka mih ki ban pynthikna ia ka jingpyrrkhing ba tyngeh halor ka jingpynshisha ia ki jaka ba ki wan ki wan bad ka jinglong trai, ka jinghap leh health checkup bad ioh syrnot.
Kala ai jingmut ruh ia ka jingdonkam ban pynlong ia ka jingtalasi ba kynsan kynsan khamtam ha ka por mynmiet ha kaba bun ki kam khaii tuh ki jia nalor ban dain kuna da kaba tyngeh ia ki nongkhaii tuh, ki nongpynbeit bad ki nongtrei Sorkar kiba iarap lane kiba ai jingiada.
Ha kajuh ka por, ka HITO kila byrngem ban pynsdang iala ka jong ka jingjurip bad jingtohkit lada ka Sorkar kam lah ban leh eiei halor kine ki jingdawa.
