Shillong, Nailar 10 : Ki Pulit ka South West Khasi Hills ryngkat ki BSF, ha ka step sngi U Blei, kila ioh kem sa ia uwei u runar Bangladesh, uba dei shibynta jong ka kynhun kaba wan pyntriem ha ka shnong Rongdangai, South West Khasi Hills.
Kumba long mynta, ki Pulit kila kem haduh 5 ngut na kine ki runar kiba la wan rung tuh ha ka sngi Thohdieng, bad pyrshang ban rahbor ia uwei u nongshongshnong ka Rangdongai bala tip kyrteng u Balsrang Marak.
Une uba dang shu ioh kem u kyrteng u Mubarak Hussain uba dei na ka shnong Kalagaon Sonamganj, Bangladesh. La kem ia u ha ka por 7 baje mynstep da ka jingiarap lang jong ki nongshongshnong na ka shnong Gilagora.
Kat kum ka jingiathuh ki Puliy, kine ki runar kila wan kumba 8-9 ngut ban rung ha Rongdondai bad rahbor ia u Balsrang hynrei une u rangbah ula ioh ban phet na kti jong ki ha ka shnong New Rongdangdai bad leit rieh ha kawei ka Iing.
Kine ki runar kila leit tied ia ka jingkhang jong kane ka Iing bad kila siat ruh katto katne kuli, kaba la pynlong ia kane ka iing ban plie ba kin rung. Kine ki runar kila shoh pynmynsaw ia u Balsrang hashuwa ba kin phet na kane ka jaka.
Ha ka janmiet sngi Saitjain, ki Pulit kila ioh jingtip ba katto katne ngut na kine ki runar Bangladesh kila leit rung ha kawei ka khlaw kaba don ha Khonjoy. Mar mar ha ryngkat bad ki BSF, kila pynlong ia ka jingkhynra bad kila ioh kem ia 4 ngut.
Kine ki saw ngut ki kyrteng u Mefus Rehman (35 snem) uba dei na Debidar District Cummila Bangladesh, u Jangir Alom (25 snem) uba na Kaziar Char PS, Jamalpur District Sadar Jamalpur Bangladesh, u Meruphur Rahman (32 snem) uba na Namapara PS: Mandargoan District Jamalpur Bangladesh bad u Saem Hussain (30 snem) uba na Mizmizi PS, Siddirgonj District Narayangonj Bangladesh.
Lah ban kdew ba ki Pulit kila ioh kurup ruh ia uwei u sde, kawei ka jingot sainar, kawei ka black magazine pouch, 1 ka jingsop ban kah dur, 1 screw driver, 1 ka wrench, 1 ka black pistol holster, 1 ka tari rit bad ka jingsop, kawei ka Bangladesh police ID card, 3 tylli ki pla thep pisa, 3 tylli ki wireless handsets bad 4 tylli ki Charger.
