Shillong, Nailar 08: U Myntri Rangbah ka jylla Conrad K Sangma u la ong ba ka sorkar ka la thaw ia ka rukom treikam ha kaban tih ia u dewiong da ka jingstad saian, kaban ailad ia ki briew ban kamai jakpoh haba bud ryntih ia ki kyndon kiba la buh.
U la kubur ba ki don ki jingeh kiba dang don haduh mynta hynrei u la pynpaw ka jingshaniah ha ka jinglah jong ka sorkar ban weng ïa ki.
Haba kren sha ki nongthoh khubor ha ka sngi Palei, u Conrad u la pyntip ba kumba 20 tylli ki par dewiong kiba heh (kumba 100 akar kawei kawei) ki la pdiang ia katei ka rukom treikam kaba thymmai.
U la kren halor ki jingeh kiban iakynduh ha ka por ba pynkylla na ka jingtih dewiong tynrai sha ka jingtih dewiong kat kum ka jingstad saian.
“(Namar) ka jingaiti ba pura na ka sorkar jylla, mynta ngi don ha ka bynta kumba nga la ong…ngi iaid mynta lyngba ka jingkylla na ka kam ban ym shah ia ki briew ban tih dewiong, sha ka jinglong jingman kaba ngi la thaw ia ka lynti treikam bad ong phi la lah ban leh ia kata, hynrei phi hap ban bud ia kane ka rukom treikam. Kumba 20 ngut tam ki briew kila pdiang. Ka dei ka par kaba heh kaba don kumba100 akar. Kumta kane ka jingtreikam ka dang ïaid bad ka paw shai ba ka sorkar ka don ha lyndet ban pynthikna ba baroh ngi bud ha ki lynti kat kum ka jingstad saian,” ong u Sangma.
U Conrad u la pynpaw ba ka sorkar kala maitphrang ia ka rukom tih dewïong kat kum ka jingstad saian, ki ba ïarap ban pynkylla ïa kane ka kam tih par bad ban pynthikna ïa ka jingbud ryntih ïa ki kyndon.
“Ka sorkar ka la sdang ban shalan dewiong sha kiwei pat ki bynta jong ka ri ha ka rukom kaba shu pyrshang, da kaba sdang kumba 9-10 tylli ki trok,” u la bynrap.
U Conrad u la pyntip ruh ba ka sorkar ka la pynlong ia ka jingtohkit halor ka jingkynnoh ba u dewiong u la jah haduh 4000 metric ton. Ula bynrap ba ka jingtohkit kala iaid shakhmat bad ia ka kaiphod yn sa aiti kham kloi kat kaba lah.
Haba kylli, u Conrad ula kynnoh ba kiei kiei kiba jia mynta ka dei namar ka jingbym leh eiei jong ka Sorkar barim ban tynjuh ia ka hukum khang tih dewiong.
Ula iathuh ia ka jingpyrshang jong ka Sorkar ban tynjuh ia ka hukum khang tih dewiong ha Supreme Court, ban iatreilang bad ka Sorkar India ha kaban thaw iaki SOP bad iatrei ryngkat ryngkat bad ki agency ka Sorkar ban pynthikna ia ka jingbud ryntih ia kki jingbthah.
Haba pynpaw ba ka Sorkar kala ieng skhem ha ka nongrim pyrshah ia ka jingtih dewong beain, u Conrad ula pyntip ba ki don da ki spah tylli ki case bala register pyrshah ia kito kiba pynkhein ia ka ain.
