Shillong, Nailar 07: Ka Mawlai hynne ka sngi ka la pynpaw ia ka jingtriem haka jingialehkai daka pynliem ia ka Sawmer da 6-2 kol ha ka jingiakhun Shillong Premier League 2025 ha madan SSA First Ground, Polo.
U Ricky Chyne (17’), u Kevin Rymbai (18’, 57’P), u Balajied Syiemlieh (23’) bad u Robert Khongriah (49’, 81’) ki la ioh thep iaki kol naka bynta ka Mawlai katba u Enestar Malngiang (68’, 79’) ula thep na ka bynta ka Sawmer.
Ka Sawmer ka la shah pynliem arsien ha ka Mawlai ha ka SPL 2024 hynrei tang da khyndiat kol.
Haka kynti ba mynta ka Mawlai kala lah ban leh bha ha bun ki liang. Ka dei ka kynhun kaba wan ha ka kyrdan ba ar ha ka samoi ialehkai bala lah katba ka Sawmer ka shu lait naka jingshah pynhiar kyrdan.
Watla baroh ar kynhun kila shim iaki sienjam ban pynkhlain ha kane ka samoi, hynrei ka Mawlai ka la paw ba kadei ka kynhun kaba khaw triem namar kala tam lypa da 3-0 tang hapoh 23 minit bad ka la lamkhmat da 5-0 hashushwa ba ka Sawmer kan ïoh ban thep iaka kol kaba nyngkong.
Ka jingïalehkai ka long kaba stet bad kaba itynnad bad u Ricky u dei uba nyngkong eh ban thep kol ha ka minit kaba 17 lyngba ka jingpass bol u Balajied.
Hadien shi minit u Kevin u la thep ïa ka kol hadien ka jingsied ka bol sha u bad nangta u Balajied u la ioh ban thep kol hadien ka jingioh iaka lad kaba suk.
Ka Sawmer kam shym la shah thep shuh haduh ba kut ka kyllastep.
Haka kylla miet ka Mawlai kala nang ialehkai bha shuh shuh ha kaba u Robert u la ioh thep hashuwa ba ka Sawmer ka shah dain daka penalty bala shut da u Kevin.
Nangta u Enestar u la lah ban thep biang ïa ka kol na ka bynta ka Sawmer bad u la ïoh ban thep sa kawei ka kol ban pynduna shuh shuh ïa ka jingïapher kol.
Hynrei tang hadien ar minit namar ka jingbakla kiba ap shadien jong ka Sawmer ka la ailad ïa u Robert ban thep ïa ka kol kaba la pynlong ïa ka Mawlai ban khur da 6-2.
Ka jingïalehkai ka ban wan kan long haduh ka 12 tarik Nailar ha kaba ka Langsning kan ïakhun pyrshah ïa ka Mylliem ha ka por 5:30 janmiet.
Iaka jingïakhun hapdeng ka Rangdajied United pyrshah ïa ka Shillong Lajong kaba la buh ban long ha ka sngi saitjaiñ, la pynkynriah noh namar ka jingkyrpad jong ka Rangdajied ba ka don bynta ha ka Durand Cup 2025 kaba dang ïaid shakhmat.
