Shillong Nailar 07: Ka sorkar jylla hynne ka sngi Palei kala mynjur ban pynkylla ia ka Financial Powers Rules 2006, da kaba pynkup bor ia u Joint Secretary ka Tnad District Council Affairs (DCA) ha kaba iadei bad ka jingpyniaid ia ka pisa pilian.
La shim ia kane ka rai ban pynbeit ryntih ia ka rukom treikam ha kaban pyllait ia ka bhah khajna sha ki lai tylli ki Autonomous District Council ka jylla Meghalaya.
Haba iakren bad ki ladpathai khubor hadien ba la wai ka jingialang jong ka kynhun myntri, u Myntri Rangbah ka jylla u Conrad K Sangma ula ong ba ka Tnad DCA kan long kum ka shnad treikam ban sam ia ki bhah khajna sha ki district council, ban pynduh noh ia ka jingdonkam ki District Council ban buddien na kiba bun tylli ki tnad sorkar.
Ula ong ba mynshwa, ki district council ki ju ioh ia ki khajna ne ia ka bhah na ka tnad Transport, Mining bad Forest kumta haba ki District Council ki leit ban buddien halor kane ka bhah ki hap ban buddien na ki 3 tylli ki tnad sorkar bad kane ka rukom treikam ka long kaba kyllain.
“Kumta ngi lah rai kum ka sorkar ban pynsuk ia ki kam ki jam kumta ka tnad DCA mynta kan long noh kum ka shnad treikam na ka bynta ban sam ia ka bhah khajna sha ki District Council bad kin ym donkam shuh ban leit sha ka tnad Mining, Forests bad Transport. Kumta mynta ban pynbeit ia kane, ia ka bor ban pyniaid ia ka pisa la pynkup ha u Joint Secretary ka DCA namar ba kam don kano kano ka Head of Department (HOD) jongka DCA kumta u Joint Secretary ha kajuh ka por yn long ruh u HOD ne Director. Ban iaid ryntih ha ka ban pynthikna ba la pyntreikam pura ia kane ka rai kumta ia ka bor pisa pilain ha pynkhamti ha u Joint Secretary ka DCA,” la ong u Conrad Sangma ryngkat bad ka banjur ba ba ka jingshim rai mynta ka sngi kan long kaba kongsan bha ban wanrah ia ka jingkylla ia ka rukom treikam jong ka tnad DCA.
U Myntri Rangbah ula pyntip ba ka kynhun myntri kala mynjur ruh ia ka jingtyrwa ban ai ia ka bor pisa pilain ha u Director ban pyniaid ia ki kam ki jam.
Nalor kane ka sorkar jylla kala mynjur ruh ban wanrah ia ki jingpynkylla jong ki 7 tylli ki Services Rules kiba kynthup ia ka Meghalaya Subordinate Treasury Accounts Service Rules, Meghalaya Urban Affairs Service Rules, 2024, Meghalaya Nursing Homes & Licensing Registration Rules, 2015, Meghalaya Judicial Service Rules 2006 and Meghalaya Judicial Rules, 2015, Meghalaya Police Telecommunication Service Rules, 2010 bad ka Meghalaya Directorate Establishment Administration Rules, 2005.
 ha kaba iadei bad ka jingpyniaid ia ka pisa pilian.){kind=link}