Shillong Nailar 06: Ka Meghalaya High Court kala pynpaw ia ka jingsngewhun halor ki sienjam bala shim da ka sorkar jylla ban leh eiei halor ki jingeh ba mih na ki ksew surok ha ka jylla.
Ka Division Bench kaba kynthup ia u Chief Justice IP Mukerji bad u Justice W Diengdoh ha ka hukum kaba la pynmih ha ka sngi Balang hadien ka jingtian bishar ia ka PIL kala ong, “Ngi sngewkmen ban tip na ka kaiphod kaba la aiti ha ka iingbishar mynta ka sngi ba la shim ia ki sienjam da ka sorkar jylla ha kaba iadei bad ka jingeh kaba pynmih da ki ksew surok”.
Ia ki Committees hapoh ka Rule 4 jongka Animal Birth Control (Dogs) Rules, 2001 la dep ban thaw ha baroh ki District kaba kynthup ia ki ar tylli ki District ka South Garo Hills bad ka West Jaintia Hills.
Ka iingbishar kala pyntip “Kala paw shuh shuh na ka kaiphod bad na ka jingpynpaw u Additional Advocate General ba ka sorkar kala pynkhreh ban pynlong ia ki jingpynsngewthuh paidbah ne Awareness Camp, ban ai dawai tika ia ki ksew surok ban lait na ka jingpang Rabies, ban ai dawai ia ki ksew kynthei ba kin ym lah ban kha khun bad ban buh ia ki ha ki jaka sah kat kaba lah ban pyniakhlad ia ki na ki briew kadei kaba la shim bad ka jingrejistar ia ki ksew kiba ri ha iing ruh kala iaid shakhmat.
Ka iingbishar hadien ba kala tian bishar ia kane ka kam, kala hukum ban pynthikna ba dei ban pyntreikam pura ia ka Prevention of Cruelty to Animals Act, 1960 bad ia ka Animal Birth Control (Dogs) Rules, 2001.
U nongmudui u Kaustav Paul, ula ioh ia ka lad ban file ia ka affidavit halor ka kaiphod jong ka sorkar hapoh ka 25 tarik u Nailar 2025.
Ia kane ka PIL yn sa shong tian bishar biang ha ka 28 tarik u Nailar 2025 ban pynkut noh hadien ba la dep shong bishar ia ka kaiphod jong ka sorkar bad ia ka affidavit kaban aiti da u nongmudui.
