Khot rung klas ka PA Sangma Medical College ia ki samla pule MBBS ka samoi 2025-26

Shillong, Naitung 30 : Ka PA Sangma International Medical College & Hospital (PIMC), ka jaka pule ba hap hapoh ka jing khmih ka University of Science and Technology Meghalaya (UTSM), kala pynbna ban sdang noh ia ka jingpynrung klas ia ki samla pule MBBS na ka bynta ka samoi pule 2025-26.

Kat kum ka jingpynbna bala pynmih da ka Directorate of Medical Education (DME), ka Sorkar Jylla, ki samla pule kiba lah ban leit pule MBBS, ki lah ban thep online ia ka aplikeshon jong ki lyngba ka portal-www.meghealth.gov.in- hashuwa ka 12 baje mynsngi jong ka 31 tarik Naitung. Ka kylla ba nyngkong jong ka counselling kan long ha ka 1 tarik Nailar haduh 7 tarik Nailar.

Ka PIMC kaba la sdang treikam naduh u Risaw 2024, kala ioh kloi ia ka jingithuh kum kawei na ki jaka pule doktor ka ban kiew bha ha ka thain Shatei Lam Mihngi. Da ki jingtei kiba paka, ki nonghikai kiba la shemphang bad ki curriculum bala pynwandur ban pyniahap ia ka jingpule bad ka rukom ai jingsumar ha ki shnong ki thaw, ka PIMC kala paw sted bha kum ka jaka pdeng jong ka lain pule doktor ka juk ba mynta.

U Chancellor ka USTM, Mahbubul Hoque, ula pynpaw ia ka jingkut jingmut jong ka jaka pule ban pynkylla ia ka kam pule doktor ha ka thain. “Ka lynti iaid jong ngi ha ka lain ka koit ka khiah kala sdang da ka University Hospital of Ayurveda & Naturopathy. Mynta, da ka PIMC, ngi la shim ia ka sienjam kaba khraw ha ka lain pule doktor, kaba kut jingmut ban saindur ia ki nongialam ka lawei ha ka koit ka khiah” ula ong.

Ka USTM kala pynlong ialade kum ka jaka pule ba lam hakhmat eh ha ka higher education. Ka dei tang maka na ki Univeristy shimet ha ka thain Shatei Lam Mihngi ban ioh ia ka ‘A’Grade na ka NAAC ha ka jingleit jurip ba nyngkong eh bad kaba la ioh ia ka kyrdan napdeng ki 200 tylli ki University kum kiba hakhlieh duh hapoh ka Ri da ka National Institutional Ranking Framework (NIRF) 2024.