Ioh ka Badadam PHC ia ka syrnot National Quality Assurance Standard ka MoHFW

Shillong, Naitung 27: Ka Babadam Primary Health Centre (PHC) West Garo Hills ka la ïoh ïa ka syrnot National Quality Assurance Standards (NQAS) ka tnat Ministry of Health and Family Welfare Sorkar India, kaba pyni ia u marmer ba kongsan ha ka jingïaid lynti ka Jylla Meghalaya sha ka jingshakri ba bha ha ka koit ka khiah paidbah.

La pynwandur da ka National Health Systems Resource Centre (NHSRC) hapoh ka Quality Council of India (QCI), ka rukom treikam jong ka NQAS ka bishar bniah ïa ki jaka sumar paidbah ha kylleng ka ri halor ki kyndon ba kongsan kum ka jingsumar ïa ki nongpang, ka jingïada na ka jingpang, ka jingkhuid jingsuba, bad ka jingai jingshakri.

Ka Babadam PHC mynta ka dei ka Primary Health Centre (PHC) kaba nyngkong eh ha baroh kawei ka thaiñ Garo Hills, ban ïoh ïa ka syrnot.

Haba pyrkhat halor kane ka jingjop, ka Sr Riya kaba dei ka Health Program Manager ha Babadam PHC ka la ong “Kane ka jingithuh ka dei ka jingkyrkhu U Blei, ka jingtrei shitom, bad ka jingaiti lut jong ka kynhun jong ngi baroh kawei. Ngi la ïatreilang ban thaw ïa ka jaka sumar kaba khuid, kaba ïadei bad ki nongpang, bad kaba paka. Ka jingpdiang ïa ka jingpynskhem na ka NQAS ka la pynshlur ïa ngi ban bteng ban kyntiew ïa ka kyrdan jong ka jingsumar na ka bynta ka imlang sahlang”

Ka Sr Riya kala ong “Kum ka jaka sumar jong ka IPA, ngi la don ka thong bad ka jing thmu katkum ki jingdonkam jong ka thaiñ, ban ïatreilang kham jan bad ki paidbah, bad ban pynkhlain ïa ka jingkitkhlieh jong ki nongtrei. Kata ka la wanrah ïa ka jingkylla kaba shisha ha ka rukom ba ngi ai ïa ki jingsumar man la ka sngi.”

Ka Babadam PHC ka dei kawei na ki 122 tylli ki jaka ba la jied katkum ka Internal Performance Agreement (IPA) model, kaba dei ka jingthmu hapoh ka Meghalaya Health Systems Strengthening Project (MHSSP) bad kaba la bei tyngka da ka World Bank.

Ka IPA ka dei ka rukom ai pisa kaba pynshong nongrim ha ki jingmih ba la shna ban pynkhlain ia ki jaka sumar da kaba pyniadei ia ka jingtreikam bad ka jingai pisa.
Ia ki jaka la bishar bniah katkum ki thong ba la buh lypa, bad kito kiba ioh ia ki score kiba kham heh ki lah ban ioh ia ki lad jingiarap bad jingkyrshan ba kham bun. Lyngba kane ka rukom, ka Jylla ka thmu ban kyrshan ia kine ki jaka ha kaba ioh ia ka jingpynshisha jong ka NQAS.

Ka jingjop jong ka Babadam PHC ka pynpaw ïa ki jingpynkhreh, ka jingpynkhlain ïa ka bor treikam bad ka jingpyrshang ban pynbha ïa ka PHC ryngkat ka jingkyrshan na ka Joint Directorate Quality Committee (JDQC), ka ophis jong ka District Medical and Health Officer (DM&HO) WGH, ka MHSSP bad ka National Health Mission (NHM). Ki la ai ka jinghikai kaba kongsan bad ka jingkyrshan.

Kane ka jingjop ka long ka jingpynshisha ia ka jingaiti jong ki nongtrei ka koit ka khiah kiba hakhmat eh ha kaba ai ia ka jingsumar kaba pynshong nongrim ha ki nongpang, wat ha ki jaka kiba jngai tam bad kiba duna ka jingshakri.

Ka long ruh kum ka jingai mynsiem ia kiwei pat ki PHC bad ki jaka sumar ha kylleng ka Meghalaya ban bud ia ki jingthew jingkhein kiba kum kita, kaba noh synniang sha ka rukom sumar paidbah kaba khlain bad kaba lah ban ieng na ka bynta ka jylla.