Agartala, Naitung 24: Ka sorkar Tripura kala pyllait paidbah ia ka scheme ban pynphai biang ia ka pisa sha ki paidbah kiba shah thok ha ka company chit fund.
Ia kane ka scheme kala sorkar jylla kala pynbna paidbah bad wanrah ruh ha khmat jong ka iing bishar jong ka Tripura High Court ha ka por ba don ka hearing ha kaba iadei bad ka jingmyntoi jong ki paidbah ha ka sngi Ba-ar.
Ka sorkar jylla ka la thaw ia ka skhim ban pynphai bad sam ia ka pisa ba la ioh pdiang biang sha ki nongthep pisa kiba shah ktah.
Katkum ka affidavit kaba la aiti da ka sorkar jylla, ka long palat ₹10.78 klur la ioh pdiang haduh mynta na ka jingdie lilam ne (auctions) ia ki jingdon jingem kaba la ioh ban kurup na ka company chit fund.
Ha kane ka jingbishar jong ka ïingbishar, u amicus curiae, u Purusottam Roy Burman u la kyntu ïa ka sorkar ba kan pynmih ïa ki jingtip ba bniah halor kane ka scheme ha ki kotkhubor, kynthup ïa ki edition ha ka ktien Bengali bad Kokborok, ka ktien jong ki jaidbynriew riewlum ka jylla.
Haba kubur ia ka jingdonkam ban pynsngewthuh paidbah, u Advocate General u Shaktimoy Chakraborty u la pyntikna ba ka sorkar jylla kala pynkhreh ban pynbna paidbah ia kane ka scheme lyngba ki kot khubor.
Haba shim khia ïa kane ka jingkyrpad, ka division bench kaba kynthup ïa u Chief Justice M S Ramachandra Rao bad u Justice M B Purakayastha ki la bthah ïa ka sorkar jylla ban pynmih ïa baroh ki jingtip ba kongsan ha kaba iadei bad kane ka scheme ha ki saw tylli ki kot khubor.
