Shillong, Naitung 20: U MLA ka Nongpoh constituency Bah Mayralborn Syiem u la ong ba ka jingdon jong ki khyrdop khrong khajna beain ha Ri-Bhoi district khamtam ha shilynter ka surok bah National Highway, ka la duna bha ha kine ki snem ba la dep.
U Bah Mayralborn u la iaroh ïa ka jingpyrshang jong ka Sorkar ban pyrkhing ia ki check gate ban pynthikna ba tang ki check gate ba la ioh bor, ki lah ban talasi ïa ki kali bad ki mar ki mata kiba iaid lyngba ki check gate.
“15 snem mynshwa baroh ki sakhi ia ka jingmih ki check gate kiba bun jait ha ki surok bah (National Highway). Kiba bun ki dei ki checkgate ba pynieng beain khlem da ioh bor kama lam sha ki kam lum pisa beain” ong u Bah Mayralborn, “Hynrei mynta ka kynti ka jinglong jingman ka la nangbha shibun.”
U la kam ba kum kine ki jingjia dawa pisa ki ju paw bha hynrei u la kdew ïa ka jingkylla kaba lah ban ïohi ha ki surokbah da kaba bynrap ba bun na ki khyrdop lum khajna beain kiba la treikam mynshuwa kim don shuh mynta.
Kat kum ka jingong une u MLA, ki tnat sorkar kum ka Forest bad ka GST mynta ki buh ia ki mobile check post ha ki jaka ba la buh kyrpang ban peit pyrman ïa ka jingkit ïa ki mar ki mata, khamtam ïa ki mar khlaw bad ki mar rep.
“Ki lah ban don ki jingjia hangne hangtai, hynrei lada khien kyllum, ym don shuh ki khyrdop lum khajna beain kiba lah ban ïohi ha shilynter ka surok bah kaba hap hapoh ka konstitwensi jong nga,” ong u Bah Mayralborn da kaba kdew ba ula leit jurip ruh da lade.
U la ban jur ia ka jingdonkam ban husiar wat iaki check gate kiba la ioh bor ban tehlakam ia ka jingpyndonkam bakla. “Kine ki mobile unit ki dei ban treikam katkum ki jingbthah ba shai jong ka sorkar. Ngi dei ban pynthikna ba kin ym leh palat ne kylla long da kumwei pat.”
