Shillong Naitung 19: U MLA ka Nongpoh bad dkhot ka Environment Committee ka Iingdorbar thaw-ain ka jylla Bah Mayralborn Syiem, ula pynpaw ia ka jingskhem jingmut ba ka jingiatreilang hapdeng ka Meghalaya bad Assam kan lam sha ka jinglah ban pynbeit noh shi syndon ia ka jinglong jingman jong ka lyer ha Byrnihat.
U Bah Mayral ula ban jur ia ka jingdonkam ban leh ia ka jingkhmih bniah kaba la ngam jylliew bha ban lap ia ka tyllong jong ka jingjaboh, la ka dei na ki karkhana kiba hapoh Meghalaya, ha ka thain khappud jong ka Assam ne na kiwei pat ki jaka ki bym lah ban ithuh.
Ula pynpaw ruh ia ka jingkongsan ban kdew beit beit ia ka daw tynrai bad khamtam ba ka jingjaboh ka lah ban mih na kano kano ka liang ha ki thain khappud jong kitei ki artylli ki jylla.
“Kane kadei ka mat kaba ktah jur ia ka mariang kaba donkam ban wad bniah bha lyngba ka jingstad saïan ban sngewthuh thik pa thik, naei ba katei ka jingpynjaboh kala mih” ula ong.
Ula pynthikna ruh ba ka sorkar Meghalaya kala shimkhia mardor bha ia kane ka mat. Ula pynkynmaw ruh ba kala don ka jingiatai hapoh ka iingdorbar thawain ka jylla bad ula ong ba u Myntri Rangbah ka jylla u Conrad K. Sangma ula kren shai bha hapoh ka iing dorbar ba ka “Sorkar kan ym shongthait ha kaban shimkhia iaka jingjaboh kaba la ktah bha ia ka thain khappud”.
Ula ong ba katei ka jingeh kadei ka mat kaba lah ban saphriang kaba dawa ba dei ban shimkhia noh mardor hi bad ula ong ba u lah dep ban iakren bad u Chairman jongka Environment Committee.
Ula bynrap ba ki jingiakren kila iaid shakhmat bad ka kynhun ka don ia ka jingthmu ban iadonbynta bad ka liang kaba na Assam ban ia shimkhia lang ban khmih ia kane ka jinglong jingman bad ban trei na ka bynta ban pynthikna ia ka lyer kaba khuid ha Byrnihat bad ha ki jaka kiba don marjan.
