Shillong, Nailur 07: Ka Sorkar Jylla kala rai ban shna noh ia ka ropeway kit briew ba nyngkong eh na Lum Shillong sha Lawsohtun ha ka jinglut jingsep ban kot T. 140 klur.
Ia kane la pyntip da u Myntri Rangbah ka Jylla hadien ba ka Kynhun Myntri kala mynjur ia ka Meghalaya Ropeway Bill, 2022 hynne ka sngi Balang.
The Bill will give a proper structure on how applications can be made for ropeways & the guidelines to be followed for setting up, the modalities for licences & safety measures for their set up.@PMOIndia @kishanreddybjp
— Conrad Sangma (@SangmaConrad) September 7, 2022
“Ka Meghalaya Ropeway Bill, 2022 kaba kongsan bha la mynjur hynne ka sngi da ka Kynhun Myntri bad ia kane yn sa wanrah noh ha ka Dorbar Synrai ban wan jong ka Iingdorbar Thaw Ain ka Jylla” ong u Conrad haba iakren bad ki nongthoh khubor.
U Conrad u ong ba ka Bill hi ka long ban buh ia ki kyndon na ka bynta ki ropeway ban kit briew/nongjngohkai kiba la khmih lynti ban wankai sha ka Jylla.
U pyntip ba ka Sorkar kala dep ban mang T. 140 klur ia ka ropeway na Lum Shillong, ka ban dei ka ropeway kit briew ba nyngkong eh ha Jylla bad ia kane la bei tyngka ka New Development Bank (NDB).
“Ngi khmih lynti ba ngin sa khot tender ban shna ia kane ka ropeway ha kine ki 15-30 sngi ban wan” ula ong.
Haba batai bniah ia ka jingthmu jong kane ka Bill, u Myntri Rangbah ula ong ba ka Bill kan ai ia ka dur ba kumno yn shna ia ka ropeway bad kiei ki kyndon ba hap ban bud ha kaban shna ia ki ropeway, ki bor treikam kiba dei ban don na ka bynta ban ai licence bad ki lad ki lynti ka jingshngain kiba dei ban shim.
Halor ka hukum ba dang shen bala pynmih da ka Iingkashari Meghalaya High Court ba bthah ia ka Sorkar Jylla ban wanrah noh ia ka Ropeway bad Cable Car kum ka sienjam ba shirta ban pynduna ia ka jingdheng kali ha Shillong, u Conrad ula ong ba ka Sorkar kala don lypa ka jingthmu ban shna ia ki ropeway ban kit briew.
Hynrei u ong “Hynrei ka jingplan bad ka jingpyntreikam ia kane ka kham kyllain namar kam dei satia ka project kaba suk hynrei khlem pep ba ha ki snem ban wan, kan sa iarap shibun ban pynduna ia ka jingdheng kali bad ka dei ruh ka lynti kaba ngin sa shim”.
U Myntri Rangbah u ong ba ka jingthmu ha ka jingwanrah ia kane ka Bill ia mynta hi ka dei tang ban kyntiew ia ka kam jngoh kai ha Jylla haba kular “Suki suki ngin sa pyniar ia ka bad ngin sa pynrung ruh ia ka jingkit briew wat ka jingkit ia ki mar”.
Kat kum ka jingong jong u, ka shimpor jan 2 snem ia ka Sorkar ban pynkhreh ia kane ka ropeway project ban kit briew/nongjngohkai ha nongbah Shillong.
“Ngi la iatyngkhuh ia shibun ki jingeh la ka dei ka jingbit, la ka dei ka pisa, la ka dei ka ain kaba donkam ban hap leh. Kane ka lynti ka long kaba jrong hynrei mynta ngi la poi ha ka khep ba ngi la dep shim ia ki jingbit ba donkam na baroh ki bor ha kaban pynthikna ia ka jaka bad mynta yn sa mynjur noh ia kane ka Bill ba kan long ain” ula ong.
