Shillong, Naitung 10: Ka samla Olivia Dkhar naka shnong Khahnar, East Jaiñtia Hills ka la shah pdiang burom haki paidbah ha ka por ba ka la wanphai sha ri-lum Jaiñtia hadien ka jinglah jong ka ban leh bha ha ka National Arm Wrestling & Para Arm Wrestling Championship 2025.
Haba mihkhmat ïa ka Meghalaya ha ka rynsan National level, ka Olivia ka la lah ban khur 2 tylli ki takma ksiar bad kawei ka takma rupa hapoh ki kyrdan bapher bapher ha kane ka lympung ïalehkai, kaba la pynlong da ka Kerala Arm Wrestling Association hapoh ka jingpeit jong ka People’s Arm Wrestling Federation India.
Kine 2 tylli ki Association ki dei kiba la ithuh daka Asian bad World Arm Wrestling Federations.
Kum ka jingai jingithuh ïa kane ka jingjop jong ka, la pynkup burom ïa ka Olivia ha Yingkieñ Myntdu da ki dkhot ka Jaiñtia Arm Wrestling Association, ki briew bad ki pulit jong ka West Jaiñtia Hills.
