Shillong, Naitung 04 : Ka samla Janice Angel Mary Sawian, kaba la jah rngai na Nongmensong, Shillong, naduh ka janmiet 1 tarik Naitung, kala mih pat ha Uttar Pradesh bad ia kane ka samla la lap ha ka step sngi Thohdieng na lynti rel.
Ka samla Janice bala 31 snem ka rta, kala jah ha ka por 4:59 baje janmiet nala iing na Nongmensong bad ki bahaiing hasem kila leit ban pyntip sha ki Pulit ka Nongmensong Police Station halor kane ka jingjia.
Hynrei, ki bahaiing kila pyntip lyngba ki rynsan social media, ba ia kane ka samla la lap noh hynne ka step sngi Thohdieng na ka lynti iaid rel kaba don ha Uttar Pradesh.
Ia kane ka samla la ialam noh da ki Pulit ka UP sha Hospital ban leh ia ka medical check up.
La ioh jingtip ba ki bahaiing lem bad ka jingsynran ki Pulit ka Jylla, kila hiar sha UP ban leit shaw ia kane ka samla.
