Dawa ka Dorbar Shnong ia ka MPSCB ban nym pat plie ia ka karkhana Ferro Alloy ha Rwiang

Shillong, Naitung 03 : Ka Dorbar Shnong ka shnong Rwiang, West Khasi Hills District, ha ka sngi Palei kala dawa ia ka Meghalaya State Pollution Control Board (MSPCB) ba kan sngap ia ki jingpynsngew ka Dorbar Shnong hashuwa ban rai weng noh ia ka hukum khang tala pyrshah ia ka Shri Shakambari Ferro Alloys Pvt Ltd.

Ia kane ka jingdawa la buh da ka kynhun ki Nongialam ka Shnong Rwiang ha ka jingiakynduh ia u Chairman ka Meghalaya State Pollution Control Board (MSPCB) ha ka sngi Palei.

Kane ka karkhana kala shah khang tala la lai bnai mynta namar ka jingpynkhein ia ki kyndon iada mariang, bad ka Sorkar Shnong kala dawa ia ka MSPCB ba kan pynthikna ba ka karkhana ka dei ban pyntreikam shuwa ia baroh ki kyndon iada mariang hashuwa ban shah plie pat ia ka.

U Sordar ka Shnong Rwiang, Bah Wiljou Iawphniaw ula ong ba ka rai jong ka Borad ban weng noh ia ka hukum khang tala khlem da iasyllok bad ka Dorbar Shnong kala pynsngew artatien ia ka jingkut jingmut jongka Board ban iada ia ka mariang.

U Bah Mosklandar Marngar, President ka Meghalaya Commercial Truck Owners and Drivers Association (MCTODA), ula iathuh ba ka Board kala pynmih ia ka hukum khang tala ia ka karkhana ha ka 23 tarik Rymphang, 2025 hadien ba ka Dorbar Shnong kala shim ia ka sienjam da kaba leit khang dam ia kane ka karkhana namar ka jingpynjaboh ia ka mariang.

U pyntip ba ha ka jingialang, ka Board kala pynshai ba ka rai ban weng noh ia ka hukum khang dam ka dei kaba la pynshong nongrim naka kaiphod kaba pyni ba ka karkhana kala pyntreikam ia ka jingbthah ban pynkhuid ia ki dpei (fly ash) napoh ka wah. Hynrei, ka Dorbar Shnong kala kam ba kam pat ju iohi satia ia kum kane ka kam ban leh da kane ka karkhana.

U Bah Mostlander ula iathuh ba ka kynhun ki Nongialam Shnong kala buh dak jingkylli halor ka rai jong ka Board ban pyn duna ia ka kuna na ka T.33.60 lak sha ka T.8.40 lak, haba kynnoh ba kane ka pyni ba ka kam khein snep ia ka jingkongsan ki jingim briew bad ka jingiada ia ka mariang.

Kila dawa ia ka Board ba kan pyniadon bynta lem ia ka Dorbar Shnong ha ka jingiashim rai ban pynthikna ia ka jing treikam kaba shai bad kaba khuid ba suba.

U Bah Mostlander ula pynpaw ruh ba ka Dorbar Shnong kala mad ia ki jingtynjuh kiba bun ban shah plie noh ia kane ka karkhana.

Haba kren sha ki nongthoh khubor, u Member Secretary ka MSPCB CH Chyrmang ula ong ba ka Board kala khang dam ia ka karkhana la palat lai bnai.

Hadien ba pynlong ia ka jingjurip, ka Task Force kala aiti ia ka kaiphod kaba pyni ba ka karkhana kala pyntreikam ia ki jingbthah ka Board. Kat kum ka nongrim jong ka jingbishar hok, ka Board kam lah ban iai bteng ha kaban khang khyrdep ia ka karkhana bad kumta, kala weng noh ia ka hukum.

Ka Board kala dain ia ka kuna na kane ka karkhana namar ka jingpynjaboh ia ka wah da kaba bret ia u fly ash. Hynrei, ka karkhana kala kyrpad, bad u Chairman ula pynduna ia ka kuna sha ka T.8 lak, hadien ba peit ia ki kyndon bala buh da ka Central Pollution Control Board (CPCB) bad mynjur da ka National Green Tribunal (NGT).

U Bah Chyrmang ula ban jur ba ka rai jong ka Board ban weng noh ia ka hukum khang dam bad ban pynduna ia ka kuna ka dei kaba la lah kat kum ka Ain.

Ula bynrap pat ba ka Board kan dang iai bteng ban peit pyrman ia ka jingpyntreikam thikna ka karkhana ia ki kyndon iada mariang.