Nongstoin, Naitung 1: Ka Khasi Students Union (KSU) Misei area unit ka la leit ujor sha u Deputy Commissioner ka West Khasi Hills District halor ka jingoh dor bad sam duna ïa u khaw Ration bad kumjuh ruh ka jingpynduh khaw ration ïa ki katto katne ki card holder ka Nongmisei Fair price shop Centre.
Ia kane ka shithi ujor la aiti da u President ka KSU Misei Area Samla Sarphosly Rongrin ha ka jingsynran lang ki nongïalam ka KSU West Khasi Hills District Unit.
Ka seng ka la ïoh ban ïakren bad ban buh ka dorkhas hakhmat u DC ban shimkhia bad ban phah tohkit da ki Magistrate halor kane ka kam. Na ka liang jong u DC u la kular hakhmat ki nongïalam ka seng ban shimkhia bad ban phah tohkit ia kane ka jingkynnoh.
Haba iakren bad ki nongthoh khubor, u Samla Sarphosly Rongrin, u la ong ba ka seng ka la ïoh ka jingujor na ki nongbam khaw rashon jong ka Nongmisei ba ki shah ohdor palat ia ka dor ba buh ka Sorkar bad ioh duna ruh na ka bhah ba ki dei ban ioh.
Ula ong ba dei halor kane ka nongrim ba ka seng kala dawa ia u DC ban phah tohkit ban lap ïa ki jingshisha.
