Shillong, Naitung 01 : Ka seng Hynniewtrep National Liberation Council (HNLC) kala dawa ban khang dam noh mardor ia ka Economic Pharmacy ha Khyndailad bad byrngem ia u trai ba u dei ban mih noh na bri u Hynniewtrep lem kumta un ngat ha kaba eh.
Ka HNLC kala byrngem ia une u trai ka Pharmacy halor ka jingkynnoh ba ula bet jynthet ia ki Kynthei ba shong dukan madan na ka surok ba don markhap ka dukan jong u,
Ha ka kyrwoh ba pyllait ha ka sngi Ba-ar, u General Secretary ka HNLC Bah Sainkupar Nongtraw ula kynnoh ia u trai ka Economic Pharmany ba u pynibor bad beh krad ia ki kynthei ba shong dukan madan marjan ka dukan jong u.
“Ka jingkam ba khlem ka rain ka rem jong u (trai ka Economic Pharmacy) ba “Um tieng iano iano ruh” ka pyni ia ka jingsarong bad jingbym burom. Ki jingleh jong u kam dei tang ka jingleh ba ibein shimet, hynrei ka dei ka jingibein ia ka Jaidbynriew baroh kawei bad ka dak thohbria ia ka burom jong ki briew jong ngi” ula ong.
“Ngi dawa ban khang noh mardor ia ka Economic Pharmacy bad ban beh krad syndon ia u train a kane ka Bri ba kyntang jong ngi” ong u Bah Sainkupar.
Une u Nongialam ka HNLC ula ong “Lada u nud ban sah, ka HNLC kan pynthikna ba un um ioh shongthait, ym ioh jingshngain, bad um ioh jaka rieh ha khyndew ka Hynniewtrep. Ka jingsuk bad jingaram kan long nongwei ha u. Kane ka dei ka jingmaham kaba khatduh. Ka jingdon jong u ka dei ka jingpynbitar kaba ngim lah shuh ban shu sngap. Lada u kyntait ban mih, ki paidbah Hynniewtrep kin ieng ban tynjuh da ka bor ba khlem sangeh”.
“Kane kam dei kaba shu jia ryngkhat. Ka dei shibynta na ki jingsuhbuit ban ialeh pyrshah, iuhroit bad pynjah burom da ki briew ba namar kiba wan buhai ha ka bri jong ngi, tuh ia ka spah jong ngi bad nud ban ber bih sha ki briew kiba dei ki trai jaka” ula bynrap.
Ha kajuh ka por, ka HNLC kala thalain ia ka Sorkar Jylla halor ka jingpynslem ban pynkynriah ia ka Them Metor na Them Iew Mawlong.
“Shano kata ka Sorkar? Ym don shano shano ruh. Jar jar. Donkti lang. Wat ka kam bala sahteng la slem bha ban pynkynriah ia ka Them Metor kala shu iaid khlem kut shuh, kaba pyni ia ka jingbym lah bad jinglong arsap ka Sorkar. Ka jingpynbeit kaba slem kam dei ka jingpynbeit satia. Hynrei, ki leh kyrkieh ban kyndang ia ki nongshong dukan madan ka bri u Hynniewtrep na ki surok, ki khun kynthei bad shynrang ka Bri kiba iaksaid man ka sngi ban im” bynrap u Bah Sainkupar.
 kala dawa ban khang dam noh mardor ia ka Economic Pharmacy ha Khyndailad bad byrngem ia u trai ba u dei ban mih noh na bri u Hynniewtrep lem kumta un ngat ha kaba eh.){kind=link}