Shillong, Naitung 01 : Ka Sorkar Jylla kala rai ban kyrpad ia ka North Eastern Hill University (NEHU) ba kan mynjur ha ka ban iapynbeit noh shabar ka Iingkashari haba iadei bad ka jingiakajia long trai ia ka Bijni Complex ha Laitumkhrah.
Ia kane la pyntip da u nongaiktien ka Sorkar MDA bad Myntri Sorkar Bah Paul Lyngdoh hadien ka jingialang bad ka kynhun jong ka Khasi Students’ Union (KSU) hapoh ka Ophis treikam jong u, ha ka sngi Ba-ar.
U Bah Paul ula ong baka Sorkar kala iakren bad ki nongialam ka KSU, kaba long sngewtynnad bha, kiba la pynpaw ia ka jingsngewkhia halor ka kam jong ka Bijni Complex.
Kat kum ka jingong jong u, kane ka kami a mynta ka dang don hapdeng ka jingbishar ka Iingkashari, da ka jingleit mudui u Registrar ka NEHU sha Meghalaya High Court halor ka rai jong ka Sorkar ban shimti noh ia ka Complex.
“Ka Sorkar kala kyrpad ia ka jingialang hapdeng u Myntri ka Tnad Pule Puthi bad ka Pro VI ka NEHU, ban iawad ia ki lad ki lynti ban iapynbeit noh shabar jong ka Iingkashari, ia kaba la ai jingmut ruh da ka KSU” ula bynrap.
Haba kylli, u Bah Paul ula ong “Ki kot ki sla ba kongsan (ba iadei bad ka Bijni Complex) kila jah bad ym lapdien shuh bad mynta kane ka kam ka don hapoh ka Iingkashari Meghalaya High Court”.
Halor ka kam ba iadei bad ka North Eastern Indira Gandhi Regional Institute of Health and Medical Sciences (NEIGRIHMS), u Bah Paul ula ong ba kawei ka rai ba donkam shim mardor ka long ban buh ia ka online exam centre ha Meghalaya. Ka NEIGRIHMS kala ai ia ka jubab kaba sngewtynnad halor kane bad kala tyrwa ban pynkha ia kane ka centre ha Shillong, Tura bad Jowai.
“Ka KSU kala pdiang ia kane ka sienjam, bad ka Sorkar kan sa iakren ruh ia kiwei pat ki mat ba dang sahteng bad u Myntri ka Sorkar Pdeng, da ka jingkyrshang bad jingiatreilang jong ka Myntri ka Koit ka Khiah” ula bynrap.
 ba kan mynjur ha ka ban iapynbeit noh shabar ka Iingkashari haba iadei bad ka jingiakajia long trai ia ka Bijni Complex ha Laitumkhrah.){kind=link}