Shillong, Jylliew 28: Ka Hynniewtrep Youth Council (HYC) ha ka sngi Thohdieng kala dawa ba dei ban leh da kaba tyngeh pyrshah ia ka jingpyndonkam bakla ia ka Meghalaya Minor Mineral Reclamation Fund (MMMRF).
Katkum ka jingpynpaw jongu President ka HYC u Roy Kupar Synrem, ula ong ba kila don katto katne ki jingdkoh bad ki jingiaid lait ia ki kyndon jingbthah, la shem ha kaba iadei bad ka jingpyndonkam ia ka pisa kaba dei na ka bynta ban pynbha biang ia ka mariang.
Ia kane la lap lyngba ka RTI, ia kaba la phah ia ka aplikeshon ha ka 28 tarik u Lber, 2025 bad 6 tarik u Jymmang 2025 ha ka ophis jongu Conservator of Forest (HQ)-cum-Public Information Officer, O/o jongu PCCF & HoFF, Meghalaya, Shillong, ula ong.
U Bah Synrem ula buh jingkylli ia ka jingthied ia ka Scorpio S11 BS 6.2 na ka bynta ka JHADC bad GHADC ha ka jinglut jingsep kaba kot T.38,34,996.
Ka jingtyrwa ban thied, la phah ha ka 29 tarik u Kyllalyngkot 2025, hynrei ka jingialang jongka Executive Committee kaba la long ha ka 22 tarik u Kyllalyngkot kam shym la iakren eiei ne ban mynjur ia katei ka jingtyrwa.
Ka jingialang jong ka General Body kaba la long ha ka 6 tarik u Lber 2025, kala mynjur ia katei ka jingtyrwa da kaba ai nuksa na ka Paragraph 7(5)(h) jong ka kyndon treikam, kaba shah ban thied, pyniaid bad ban sumar ia ki kali ne “Patrol Vehicle” ban lap bad ban tehlakam ia ki kam tih be-aiñ.
Ka HYC kala kdew ruh ba ka T.17,09,288 kadei kaba la pynlut da ka MMMRFMA khlem ka jingkhot Tender ne ban pynmih ia ka notis ban khot ia ka tender na ka bynta ban thied ia ki Laptop, Desktop bad kiwei kiwei ki tiar elektronik. Ka jingduna ha ka jingkhuid jingsuba bad ka jingiakhun ha kaban thep tender kala pynmih ia ka jingsngewkhia ba ka don ka jingshah liang bad ka jingbamsap.
Ka HYC kala pynpaw ruh ba ka projek jongka Eco-Development Society (EDS) ha kaba iadei bad ki kam Eco-Tourism ha sawdong jongka Nongkhyllem Wildlife Sanctuary, la mynjur ia ka T.20,09,01,750. Hynrei ki bor khmih kiba la soi kila ai ia ka Cheque kaba T. 21,23,93,331 khlem da pynshisha ia ka jingshisha bad ia ka jingkhein jingdiah, kaba lam sha ka jingsuba sniew ba kala don ka jingpynbakla bad ka jingpyndonkam bakla ia ka pisa.
Ha kaba iadei bad kitei ki jingduna bad jingdkoh, ka HYC kala dawa na u Myntri Rangbah ban leh da kaba tyngeh pyrshah ia kito kiba donkti bad ban pynthikna ba katei ka pisa kadei ban pyniaid bad pyndonkam ha ka lynti kaba dei, kaba iaid ryntih bad ha ka lynti kaba khuid ba suba, la pynpaw u Bah Synrem ha ka kyrwoh khubor.
Ka HYC kala kyntu ruh ai ka Meghalaya High Court ban tuklar lem ia kane ka mat bad ban ai ia ki jingbthah ia ka sorkar jylla ha kaba iadei bad ka jingpyndonkam ia ka pisa.
 ha ka sngi Thohdieng kala dawa ba dei ban leh da kaba tyngeh pyrshah ia ka jingpyndonkam bakla ia ka Meghalaya Minor Mineral Reclamation Fund (MMMRF).){kind=link}