Hapoh 3 snem, kurup ki Pulit ia ki jingdih buaid ba shongdot palat T.1000 klur
Shillong, Jylliew 26 : Ka Meghalaya ha ka sngi Palei kala pynskhem biang ia ka jingkut jingmut ban iakhun thma pyrshah ia u droks bad u Myntri Rangbah ka Jylla Conrad K Sangma ula pyllait paidbah ia ka lynti treikam (roadmap) kaba bniah bad ba iohi jngai ha ka jingialang rakhe ia ka International Day Against Drug Abuse & Illicit Trafficking.
Ia kane ka jingrakhe la pynlong ha State Convention Centre bad la pyniaid ia ka da ka Tnad Social Welfare ryngkat ka jingiatreilang bad ka Meghalaya Police, Meghalaya AIDS Control Society, bad ka Drug Reduction, Elimination and Action Mission (DREAM), United Leaders, Frontline Workers, hapoh ka matpdeng “Bthah ia u Kynjri : Ka jingiada, jingsumar bad jingkoit ia baroh” (Breaking the Chains: Prevention, Treatment and Recovery for All).
Haba ai jingkren, u Myntri Rangbah ula ban jur ba ka jingiakhun pyrshah ia u droks ka iaid palat ban ia ka jingtehlakam. “Ngim lah ban shu khmih ia ka tang ka kam pyntreikam ia ka ain. Ka dei ka kam kaba ktah ia ka koit ka khiah u paidbah, ka imlang sahlang bad ki kam ka roi ka par” ula ong haba bynrap “Ka DREAM ka dei ka mishon jong ngi ban iakhun lang ia kane-kum ka Jylla, kum ki nongshongshnong”.
Haba kren halor ki jingjop ha ka jingtreikam ki nongpynjari ain, u Myntri Rangbah ula sei madan ia ki jingkhein jingdiah ba pyntip ba ha kine ki lai snem, ki Pulit ka Jylla kila ioh kurup ia ki jingdih buaid ba shongdor palat T.1000 klur ba kynthup ia u heroin, ganja, opium bad crystal meth. Ha kine ki snem, haduh 1031 tylli ki case la ujor bad palat 422 la dep ban chargesheet.
Ban pynkhlain shuh shuh ia kane ka jingiakhun, ka Sorkar kala thaw ia ki Kynhun treikam (Unit) ba kyrpang kum ka Anti Narcotics Task Force (ANTF), bad wanrah ia ki tiar bad kor ka juk kum ki drug scanner bad ki ksew sma bala hikai pyntbit bha.
U Myntri Rangbah ula buh ruh ia ka jingkyntu naduh ka mynsiem ia baroh ki nongshongshnong-ki nonghkai, ki nongialam shnong, ki sengbhalang bad ki longiing longsem-ban iashimbynta shitrhem ha kane ka jingiakhun pyrshah ia u droks.
“To ngin ym ia kdew kti. To ngin ia snohkti lang” ula ong bad bynrap “Ki samla ka Jylla ki dei ka spah bah jong ngi bad ngin ym ailad ba u droks un tuh noh ia ka lawei ka jong ki. Ngin iakhun lang ia kane ka thma-bad ngin ioh ia ka jingjop”.
Hadien kane, u Myntri Rangbah ula ialam ruh ban iabam smai kum shibynta jong ka National Nasha Mukh Bharat Abhiyan.
Kawei na ki jingai jingkren ba shongsbai eh ha kane ka sngi ka dei ka jingiathuh khaba ia ka jingshem da u Isaac Surong, uba la jop pyrshah ia ka jingkyrni. Ula iathuh khana ba kumno u poi ngop ha u heroin bad pynioh pat iala ka jong ka jingim lyngba ka jingngeit, ka jingkyrshan ba u ioh bad ka jingsumar.
Kane ka jingiathuh khana kala ktah bha ia u Myntri Rangbah ka Jylla uba la kynthoh “Ka khana u Isaac ka dei kawei ka jingkyrmen, ka jingshlur bad ka mynsiem ialeh. Ngin iai bteng ban iaidryngkat bad u bad kiwei ruh kiba kum ma u”.
Kane ka jingrakhe kala pyndon burom ruh ia palat 20 ngut ki recovery champion kiba long kum ki sharak ka jingkyrmen ha ki shnong ki thaw jong ki.
Ia kane ka jingrakhe la pynkut da ka jingpynkup burom ia ki nongjop ha ki jingiakop bapher bapher ki ba ialap pyrshah ia u droks kum ka lympung ialehkai phutbol, basketball, ka cycle rally, ka rynsan iaput iatem bad kiwei kiwei.
 kaba bniah bad ba iohi jngai ha ka jingialang rakhe ia ka International Day Against Drug Abuse & Illicit Trafficking.){kind=link}