Shillong Jylliew 23: U Sirdar jongka Elaka Laitkroh u Bah Pailastar Kharkongor hynne ka sngi Nyngkong, ula ioh ia ka kabu kaba kyrpang ha kaban plie ia ka ophis treikam kaba dang shu dei tei jongka Khatarshnong Laitkroh C&RD Block ha ryngkat ka jingdonlang u Myntri Rangbah ka jylla u Conrad K. Sangma, ki MLA kiba kynthup ia u Bah Gavin Miguel Mylliem bad u Bah Matthew Beyond Kurbah.
Haba kren ha ka jingialang, u Myntri Rangbah ula ong, ba ka sorkar ka iengskhem ha ka nongrim ban pyndon bynta lang ia ki nongialam shnong bad ia ki paidbah baroh ha ki sienjam kiba kongsan jong ka roi ka par.
“Ngi ngeit ba ka jingai jingshakri ka sorkar kaba kyllum, kala sdang da ka jing pyndon bynta lang ia baroh. Ka jingplie ia ki jingtei jong ka sorkar da ki nongialam shnong kum u Sirdar ka pyni shai ia ka jingiohi jngai ka jong ngi ban wanrah ia ka jingsynshar kaba iajan bad ki paidbah bad ban pynneh ia ka jingsngew ia ka jingiadon bynta lang ban tynrong ia ka jingkitkhlieh bad ia ka jinglongtrai” ula ong.
Kane ka jingtei ne building kaba thymmai jongka Block Integrated Development Complex ka dei shi bynta jongka jingshimkhia ban shna bha ia ki jingtei jong baroh ki 46 tylli ki Block kiba la don lypa bad 10 tylli ki Block kiba la dep pynkha thymmai kiba don ha kylleng ka jylla Meghalaya. Kane ka jingtuklar ka long da ka jingthmu ban pynkylla ia ki jingtei kiba la rim bad kiba la jot sha ki jingtei kiba thymmai katkum kane ka juk bad kiba don ia ki jingdonkam kiba iadei bad ki nongshong shnong.
“Haba ngi la shimti ia ka kam ha u snem 2018, Ngi la shem ba kiba bun ki ophis jongki Block kila rim bad jot. Kumta ngi la shim da kaba iaid ha ka mishon ban pynbha ia ki jingtei ha ki thain nongkyndong ha ki district baroh. Na ka jingmaramot ia ki Police Station bad Sub-Division Office sha ka jingbhah tyngka ban tei ia ki DC Office kiba thymmai, Staff Quarter bad Multi-Purpose Halls—Ngi dang trei ban tei ia ki paia kiba skhem na ka bynta ka jingai jingshakri ha ki shnong ki thaw” la ong u Myntri Rangbah.
Haba banjur ia ka jingkongsan jong ka jingiashimbynta lang jong ki nongshong shnong, u Myntri Rangbah ula ong, “Ngi kwah ba ki paidbah kim dei tang ban long ki nongpeitkai ia ka jingkiew ka roi ka par hynrei ngi kwah ba kidei ban iadonbynta lang bad ka. Da kaba iawer ia baroh kiba donbynta lang ha ka shnong ban plie ia ka ia ki skhim ha ka bha ka miat bad ia ki projek bapher, ngi pynshlur ia ka jingsngewsarong bad ia ka jingkitkhlieh jong ki paidbah”.
Kane ka jingtreikam kaba pyrkhat na ka bynta ki paidbah kadei ka roi ka par kaba don ia ka jingiatreilang kaba shim ia ka jingkongsan ia ka kamram jong ki khlieh nongsynshar, ki nongialam shnong bad ki nongshong shnong ha kaban tei ia ka jingiaid shaphrang jong ka jylla.
