Shillong, Jylliew 23 : Ka Iingkashari Meghalaya High Court ha ka sngi Nyngkong, kala sospon syndon ne pynsangeh shipor ia ka hukum bala pynmih da ka Executive Committee ba ialam ka Voice of the People Party (VPP) ha Khasi Hills Autonomous District Council (KHADC), kaba khein iap ia ka hukum thungkam pura (regularization) ia palat 30 ngut ki nongtrei casual.
Ka hukum ka KHADC bala pynmih ha ka 30 tarik Jymmang, 2025, kala shah pynsangeh ha ka Iingkashari hadien ba hynriew ngut ki nongtrei, kynthup ia 4 ngut ki Junior Engineer bad 2 ngut ki Junior Architect, kila leit tynjuh pyrshah ia ka hukum jong ka Council hakhmat ka Ain.
Kine ki nongmudui ba kynthup ia u Wallamjinghun Nongsiej, Andrew Mulieh, Moodifield Lyngdoh, Lariboklang Marbaniang, Dale-Mid-Gift Marbaniang, bad Saffiona Dkhar, kila shah thung kam pura hadien ba ki pyndep ia ka kam contract ba palat shisnem Hynrei ka EC ka KHADC kala khein iap ia ka hukum thungkam pura jong ki ha ka 30 tarik Jymmang, 2025, khlem da ai kano kano ka jingpyntip lane ai ia kano kano ka lad ban sngap lem ia ki jingpynsngew kine ki nongtrei ba shah ktah.
U Wallamjinghun bad Lariboklang kila shah thung kum ki contract Junior Engineer ha ka 16 tarik Nailar 2023 katba u Andrew bad Moodifield kila shah thung ha ka 31 tarik Nailar, 2023 halor ka jingpynbna laitkam bala pynmih ha ka 25 tarik Naitung, 2023 bad 22 tarik Nailar, 2023.
Hadien ba ki pyndep ia ka jingshakri ba palat shisnem kum ki nongtrei contract, ia ka jingshakri u Wallamjinghun bad Lariboklang la pynskhem ne thungkam pura noh kum ki Junior Engineer ha ka 24 tarik Kyllalyngkot 2025 katba ia u Andrew bad Moodifield la pynskhem ne thungkam pura ha ka 1 tarik Risaw, 2024, kaba long kat kum ka rai jong ka Executive Committee jong ka KHADC.
U Dale-Mid-Gift bad Safiona kila shah thungkam ha ka 26 tarik Risaw, 2023 bad ha ka 20 tarik Nohprah, 2023 kat kum ka jingpynbna laitkam bala pynmih ha ka 22 tarik Nailar, 2023. Ia ka jingshakri u Dale Mid Gift la pynskhem ne thungkam pura kum u Junior Architect ha ka 1 tarik Risaw 2024 katba jong ka Safiona la pynskhem ne thungkam pura ha ka 24 tarik Jyllalyngkot, 2025.
Ha ka hukum, ka Iingkashari Single Bench bala khlieh da u Justice B Bhattacharjee kala shem ba ka Office Order (KHADC) bala tynjuh, kam shym la pynpaw sati aba ki applicant kila ioh ia ka notice lane ai ia kano kano ka lad ban sngap ia ki hashuwa ka rai ban khein iap ia ka jingthungkam pura ia ki kum ki Junioe Engineer.
Kala ong ruh ba watla ha kane ka hukum bala tynjuh, la pynpaw ba ka jingthungkam pura ia ka jingshakri jong kine ki applicant ka long shabar jong ka rule kum ka daw ba khein iap noh ia ka jingthungkam pura ia ki, hynrei ym shym la don kano kano ka jingbatai ban pyni ba kiei kita ki kyndon jong ka rule ba ym shym la bud haba thungkam pura ia ka jingshakri jong kine ki applicant.
“Namar kata, ia mynta, la sngew iahap ban sospon shuwa ia ka jingtreikam jong kane ka hukum ka KHADC ba 30 tarik Jymmang, 2025 tad haduh ka sien shong bishar ban wan” ong ka Iingkashari.
 ha Khasi Hills Autonomous District Council (KHADC), kaba khein iap ia ka hukum thungkam pura (regularization) ia palat 30 ngut ki nongtrei casual.){kind=link}