Goalpara, Jylliew 23: U MP ka seng Congress u Rakibul Hussain u la shah pakhang lynti haka por ba u mut leit jurip iaka jaka ba shah pynkynriah ki briew ha Hachila Beel kaba don ha Goalpara district jong ka Assam.
Ki nongshong shnong, kiba la bitar halor ka jingshah pynkynriah kaba la pynlong ïa kiba bun ban duh iala ki ïing ki sem, la kynnoh ba ki paidbah kila khanglad ïa ka kali jong u MP kaba la pynbor ïa u ban phai noh hashwa ban poi ha katei ka jaka.
La iathuh ba u Rakibul Hussain uba mihkhmat ia ka Dhubri parliamentary constituency u la iakynduh ia ka kynhun nongshong shnong kiba la shah pynkynriah na katei ka jaka, kiba dawa ia u ban pynshai halor ka jingshah pynkynriah.
Ka jingïania ka la nang jur, kaba la pynlong ïaka kynhun jong u MP ban hap ban mih noh na katei ka jaka khlem da ïakynduh ïa ki longïing kiba la shah pynkynriah.
Haba kren sha ki nongthoh khubor ha ophis jong ka Goalpara district Congress, u Rakibum Hussain u la kyntait ia ki jingkynnoh ba u la shah pakhang lynti ha ki paidbah.
U MP u la kynnoh ba ki bor District ki la khanglad ia u ban poi sha katei ka jaka. “Ki paidbah kim shym la pyrshah ia nga. Dei ka bor district kaba la khanglad ia ngi,” u la ong.
Halor kane ka jingjia, u Myntri Rangbah ka Jylla Assam u Himanta Biswa Sarma, ha ka jingïakren bad ki nongthoh khubor hadien ka jingïalang jong ka kynhun Myntri Sorkar, u la ong “U Hussain, uba la jop da ka jingïapher kaba palat 10 lak vote, u la shah kyntait ha ka jaitbynriew Muslim kaba kren Bengali bad kaba ju kyrshan ïa u. Kane kam dei ka jingjia kaba kyrpang. Ki jingjia kiba kum kine ki la jia ha Dhubri bad Goalpara,”.
U Himanta la ong ba ka BJP kam don bor halor ki nongthep Vote Muslim Bengali bad ba ka Congress kam dei ban kynnoh ïa ka BJP halor ka jingshah pynphai kylla ki nongialam haki paidbah.
