Shillong, Jylliew 17 : U Myntri Sorkar bad MLA ka BJP Bah A.L Hek ha ka sngi ba-ar, ula ong ba ka Meghalaya Residents, Safety and Security Act (MRSSA), 2016 ka dei kawei na ki ain kiba biang palat ban pynthikna ia ka jingshngain bad jingiada ia ki nongjngohkai bad ki nongwankai shapoh ka Jylla Meghalaya.
Haba iakren bad ki nongthoh khubor, u Bah Hek ula ong ba ka Ain ka pynkupbor ia ki Dorbar Shnong ban pynthikna ia ka jingpynrung kyrteng khlem pep, ia ki briew kiba wan sah ha ki shnong jong ki bad ban iatreilang ruh bad ki Pulit na ka bynta ka jingshngain jong ki Nongshongshnong bad ki briew kiba wan na shabar ka Jylla.
Kat kum ka jingong jong u, ka jingbuh ia ki Entry bad Exit Point kin ym donkam satia lada lah ban pyntreikam pura ia kane ka ain.
“Ka MRSSA ka dei kaba biang eh ha nga, ha ka por ba wanrah ia kane, ynda kila sdang pyntrei ia ka MRSSA, ki jingbym biang kin don beit hynrei ngi la don ia kane ka ain, balei bym pyndonkam satia ia ka” ula ong.
Hadien ka jingshah pyniap u nongwan jngohkai na Indore ha Sohra, ka Sorkar Jylla kala rai ban khyllie kitap biang ia ka MRSSA ban nang ai bniat shuh shuh ia ka khnang ban tehlakam ia ki riew bymman ba kin wan rung sha Jylla.
U Bah Hek ula pynpaw ia ka jingkmen ba ki Pulit kila pyndep ia ka jingpynwandur ia kaei kaba jia ia une u nongwan jngoh kai ha Sohra.
Ula ong ba u dei u MLA ba nyngkong eh bad uba nyngkong na ki Myntri Sorkar uba la leit sha Sohra ban peit ia ka jingia wad briew hadien ka khubor ka jingjah rngai ki shijur na Indore kata u Raja bad ka Sonam Raghuvanshi.
“Nga la leit shatei hadien ka jingioh jingtip bad jingkyrpad na ki paralok na Indore, Madhya Pradesh” ula bynrap.
U Myntri ula ai khublei ruh ia ki Pulit ka Jylla bad ia baroh kiba don bynta ha ka jingiawad ia kine ki shijur.
, 2016 ka dei kawei na ki ain kiba biang palat ban pynthikna ia ka jingshngain bad jingiada ia ki nongjngohkai bad ki nongwankai shapoh ka Jylla Meghalaya.){kind=link}