Sub- Pom nyngkong u Vishal, bud sa u Anand, pyndep syndon u Akash
Shillong, June 17: Ka wait ka ba-ar, kaba la pyndonkam ban pom ia u nongwan jngohkai na Indore u Raja Raghuvanshi, la lap hynne ka sngi ba-ar napoh ka riat kaba don hajan ka kshaid Weisawdong – ka jaka kaba lap ia ka metiap kaba la kem pyut jong u Raja, ha ka jingleit ialam ki pulit ia ki suba donkti ban pynwandur biang ia kaei kaba jia.
Ka kynhun Special Investigation Team (SIT) ka Jylla kala leit ialam hynne ka sngi ia ka Sonam Raghuvanshi ryngkat bad 3 ngut ki paralok jong u samla baka iaieid Raj Singh Kushwaha – u Akash Rajput, Vishal Singh Chauhan bad Anand Kurmi kiba la donkti ha kaban pyniap ia u Raja, sha Sohra, kaba dei ka sngi ba hynniew jong ka jingtohkit ka kynhun ia kane ka jingjia.
Haba iakren bad ki nongthoh khubor, u Superintendent of Police ka East Khasi Hills Bah Vivek Syiem ula ong, “Ka Sonam bad ki 3 ngut ki runar kila ai ka jingbatai ia kaei kaba jia ban pynwandur biang ia ka rukom pyniap ia u Raja. Ngi lah ioh ia ka dur ka dar kaba shai kdar bad ngi lah ring video ruh bad kila don ruh ki nongsakhi shimet bad kane ka jingpynwandur biang ia ka jingjia ka long kaba seisoh”.
Ula ong ba ka Special Investigation Team (SIT) kala pynlong ia ka jingpynwandur ia katei ka jingjia ha ki 5 tylli ki jaka kaba la sdang naduh ka Shnong Mawlakhiat shaduh Weisawdong Parking Lot.
” Kane ka jingpynwandur biang ia ka jingjia kadei kaba la pynshong nongrim katkum ka jingtohkit kaba ngi lah leh ha kine ki sngi kiba la dep, ha kaba kiba la shah suba donkti kila kubur ba kila leh ia katei ka kam sniew” ula ong.
“Ngi la sdang na Mawlakhiat Parking Lot ia kaba kila pynieng ia ki thuk thuk bad ngi la iaid sha ka jaka kaba don 3-4 km na Weisawdong parking lot, ha kaba kila sangeh ban shondur bad kala don ka jingthmu ban pyniap ia u Raja ha katei ka jaka hynrei kam shym la urlong haba u Raja ula niah noh ia ka thuk thuk kumta kila iaid beit noh shakhmat. Kila sangeh 200 mitar ka jingjngai na ka Weisawdong parking lot, bad hangne la shon tang ia ki dur bad ym shim la pyrshang ban shim ia ka jingim ha kane ka por”.
“Ngi lah wan ha Weisawdong parking lot, ia kaba la pynieng ia ki thuk thuk ha kaba kila leit rung sha ka viewpoint. Hadien katei ngi lah leit sha viewpoint bad ngi lah pynman ba u Raja ula iengkai” ong u Bah Syiem haba bynrap “Ban pynwan biang ia katei baroh, ngi lah ialam ia uwei u dkhot jongka Fire and Emergency Services ban ak kum u Raja. Ngi lah pynwandur biang ia ka rukom ieng hashwa ban shah pyniap, kumno u ieng bad kumno ula shah pom. Kala don 3 sien ka jingshah pom, kaba nyngkong kadei na u Vishal ba ju khot sin u Vicky, ka jingpom ka baar kadei na u Anand bad ia ka jingpom kaba khatduh kadei kaba la leh da u Anand.
U SP ula pyntip ba ia ka wait ka baar la lap napoh ka riat ha Weisawdong. Kane kala paw pyrthei ha ka jingtohkit ia kine kiba suba donkti kiba don hapdeng ka jingtohkit ba 8 sngi.
“Kila pyni kumno ba kila bret ia ki artylli ki wait. Ia ka wait kaba nyngkong kaba la bret kadei kaba la dep ban lap bad ka don ia u jingbat uba rongsoh (Orange). Ka wait ka baar ka don ia u jingbat ba don da ka kynja nar (Steel)” ula ong haba bynrap ba ka kynhun jongka SDRF kala pyndonkam ia ki Metal Detector ban lap ia katei ka wait ka ba-ar kaba la pyndonkam ha kaban pyniap ia u Raja.
Nalor kane u Bah Syiem ula ong ba ka SIT kala pynwandur ruh halor ka jingiohtam ia ka sopti ronglieh jongu Akash, ia kaba la lap ryngkat bad ka metiap jong u Raja ha ka 2 tarik u Jylliew bad la pyni ruh kumno ula bret ia katei ka sopti.
“Ngi la pynwandur biang ruh ia kaei kaba jia ia ka mobile jongu Raja, ia kaba nyngkong la pynpait bad pynjulor noh da ka Sonam bad hadien da u Vishal. Kumta kane baroh kadei kaba la leh bad pynwandur biang bad kumno kila mih noh na katei ka jaka” ula ong shuh shuh.
Ha kawei pat ka liang u SP ula pynpaw ba ki pulit kila kut jingmut ha kaban Chargesheet ia kane ka case ha ka por kaba kloi bha.
