Imphal, Jylliew 17: Ka khlam jingpang COVID 19 mynta kala kiew sha ka jingdon ki briew kiba ioh ia kane ka jingpang sha 20 ngut hadien ka jinglap thymmai biang sa ia 7 ngut ki briew hapoh ka jylla Manipur.
Katkum ki ophisar ka tnad ka koit ka khiah, baroh kiba la ioh ia kane ka khlam jingpang ha ka sngi Nyngkong kila kiew sha ka 20 ngut, bad ki don 14 ngut la ioh khubor ba kidei na Imphal West district, lai ngut na Imphal East district bad mar iwei na Kakching, Thoubal bad na Bishnupur districts.
Kine baroh san tylli ki district ki hap hapoh ki jaka them jong ka thain Imphal.
Katkum ki reports, ha ka 9 tarik mynta u bnai Jylliew, la lap ba kawei ka longkmie ba 23 snem la test positive ia ka jingpang Covid-19 ha Manipur, ka dei ka jingpang ba nyngkong ba la lap biang ha ka thaiñ shatei lammihngi kiba shah ktah ha kane ka khlam jingpang.
Na ka liang u Director ka Manipur Health Services u Dr Chambo Gonmei u la ong ba kane ka longkmie kadei na Bishnupur District kaba la ioh ia kine ki dak ki shin kum ka jingpang covid.
Ia ki ‘dak ki shin’ (sample) jong ka la test ha kawei ka jaka sumar shimet ha Imphal ha ka 5 tarik u bnai Jylliew, bad ka kaiphod ka la mih ha ka 9 tarik Jylliew, la ong u Dr Gonmei bad u la kyrpad ia ki paidbah ba kidei ban long kiba husiar na ka jingsaphriang sha kiwei pat ki bynta jong ka ri.
Ha kajuh ka por u Lat ka jylla Manipur uAjay Kumar Bhalla u la pyniaid ia ka jingialang review meeting halor ka Covid-19 ha ka sngi Nyngkong ha Raj Bhavan.
Ha kane ka jingialang la wan ban ia shim bynta lang da u Chief Secretary u Prashant Kumar Singh, kiwei de ki heh ophisar na ka tnad ka koit ka khiah bad kiwei de ki tnad trei kam.
Ia kan ka jingialang la pynlong hadien ka jingbthah jong ka Ministry of Health and Family Welfare (MoHFW) na ka bynta ban pynkhreh lypa ban iakhun pyrshah namar ka jingsngewkhia ha kaba iadei bad ka jingkiew jong ka khlamCovid-19.
