Shillong, Jylliew 13 : U Myntri ki kam Jngohkai Bah Paul Lyngdoh ha ka sngi Thohdieng, ula ong ba ka jingwan iuhkjat jong ki nongwan shangkai pyrthei ha Sohra kala nang kiew wat hapdeng ka jing pyrshang ban pyntieng pynsmiej bad pynthohbria ia ka Jylla hadien ka jingshah pyniap u nongwan shangkai na Indore.
Kat kum ka jingong jong u, ka jingwan iuhkjat ki nongshangkai pyrthei la khmih lynti ba kan kot 20 lak hadien jong ka Cherry Blossom Festival ka ban long ha kine ki bnai ban wan.
“Katba ngi dang iakren hangne, ka jingwan iuhkjat ha Sohra kala nang kiew. Kila nang bun nang bun ki nongwan kai. Wat ha por bym pat lah sei madan ia ki jingshisha halor kane ka case (jingpyniap), ka jingwan iukjat ka dang neh kumjuh. Mynta ba ka kyrteng ka Meghalaya kala khuid, ngi nud ban ong ba ka jingwan kai ki briew kan sa nang kiew bad ngi khmih lynti ba kan kot 20 lak hashuwa ka Cherry Blossom Festival” ong u Bah Paul haba iakren bad ki nongthoh khubor.
Haba kylli, u Myntri ula ong ba ka jingsdang jong ka jingdawa ka Sorkar ban panmap kala mih hadien ka jingmih ki jingkynthoh ba laiphew jait kynthup ka jingpynshit ban thombor ia ki briew kiba dei na Meghalaya hadien kane ka jingjia ha Sohra.
“Ha ka sngi kaba bud hi, bun na ki lad pathai khubor ka Ri kynthup ka Times of India, Republic TV nalor ki blockers shimet, kila panmap paidbah. Kumta, kila leh ia kaei kaba ngi la dawa” ula ong.
Haba pynpaw ba kane ka kam kala kut, u Bah Paul ula ong “Ngi la kren shai kdar ba lada phim panmap, ngin ujot da ka mukotduma pynmynrain khmat bad ngi la dep ujor ejahar ruh kumjuh. Mynta ba kila nguid biang iala ki kyntien kum ki bahaiing jong u briew ba iap kila panmap paidbah ia ka Sorkar bad ki briew ka Meghalaya, kane ka kam kala kut noh hangtei”.
Nalor kane, u Myntri u pyntip ba ka Jylla kala dep don ia ka Tourism App, kaba buh thup ia ki jingtip baroh halor ka iaid ka ieng ki nongwan shangkai, kynthup ki kali lane kiei ki kali ba ki pyndonkam bad ruh ka jingpynrung kyrteng jong baroh kiba wankai ha ki homestay, resort bad hotel.
“Mynta, ka jingpyndonkam ia kane ka App ka dang kot kumba 50% hynrei mynta ngin pynlong kongsan noh ba baroh ki homestay, resort, hotel bad kiwei kiwei ki iingbasa ki dei ban pynryng kyrteng khlem pep ia baroh kiba wan sah” ula bynrap.
Ha kajuh ka por, u Myntri ula iathuh ba ka Tnad kala dep pynmih ia ka jingpynbna ba khot ia ki samla kiba nang kren bha ha ka Khasi, Garo, English bad Hindi ba kin wan rung hapoh ka Tourist Buddy Scheme bad hapoh kine ki arbnai ban wan, ngin sa lah ban thungkam da ki spah ngut ki Tourist Buddies.
