Shillong, Jylliew 09 : Ka Meghalaya Police ha ka sngi Nyngkong, kala pynpaw ba ka jingthmu ha lyndet ka jingpyniap ia u nongwan leh honeymoon na Indore Raja raghuvanshi ka lah ban dei na ka jingkynnoh don jingiadei ka Kurim, Sonam Raghuvanshi bad u Raj Kushwaha, uba dei uwei na ki 4 ngut kiba la kem na Madhya Pradesh.
“Ka jingtohkit ba dang shu sdang malu mala, ka pynpaw ba (don ka kam iaieid samla ha kane ka jingjia)…Ynda ngi la pyniasoh ia baroh ki dak ki shin, la lap ba dei u Raj Kushwaha bad ka Sonam. Ynda kila wan poi shane, ngin sa pynthikna ia kane hynrei ia mynta, ngan ym pat lah ban ong ia kaei ka jingthmu jong ki hynrei kaei kaba paw ka thew sha ta (jingiaieid samla)” ong u Superintendent of Police ka East Khasi Hills Vivek Syiem haba iakren bad ki nongthoh khubor.
U pyntip ba ia baroh ki saw ngut ki briew bala kem kynthup ia u Raj Kushwaha (21), Akash Rajput (19) kiba dei na Lalitpur, u Vishal Singh Chauhan (22) bad u Anand Kuli (23) la rah tian bishar hakhmat ka Iingkashari.
“Ka kynhun jong ngi kala leit sha Uttar Pradesh ban kem ia ka Sonam (kaba la pyndem ialade ha Nandganj Police Station ha Ghazipur District). Artylli ki kynhun kila leit ha ka 8 tarik Jylliew, ia ka jingkhynra la pynlong hynnin ka sngi ha ryngkat ki Pulit ka UP bad MP bad ka kynhun kaba lai ka dang don ha lynti ban leit kem ia ka Sonam” ong u bah Vivek haba bynrap ba ki Pulit ka Jylla kila pan ia ka jingbit ban wankit ia baroh kine ki briew sha Shillong ban ioh pynlong ia ka jingthkit kaba bniah.
U bah Vivek u pynthikna ba u Kushwaha u khlem wan satia sha Shillong hynrei u dei ma u, uba bthah ia ki laingut ki runar-ia kiba la iathuh da u tourist guide ba u iohi ia ki lem bad kine ki shijur ha ka sngi ba ki jah rngai na Sohra-ban pyniap ia u Raja.
U Raja bad ka Sonam kila jah rngai ha ka 23 tarik Jymmang, ha ka jingleit leh honeymoon sha Sohra bad ha ka 2 tarik Jylliew, la lap ia ka metiap u Raja napoh ka riat ba jylliew bha hajan ka Kshaid Wei Sawdong.
Kat kum ka jingong u Bah Vivek, ka kaiphod post mortem na North Eastern Indira Gandhi Regional Institute of Health & Medical Sciences (NEIGRIHMS) la pyntip ba ki don artylli ki dak ot na ka khlieh jong u Raja raghuvanshi-kawei na lyngkdong bad kawei na shyllang.
Haba kylli, une u heh Pulit u iathuh ba ia ka jingkem la pynshong nongrim halor ki sakhi satar kiba khlain bha.
“Ha kane ka por, ngi lah ban ong ba ka SIT hapoh ka hynniew sngi kila ioh ia ki sakhi satar kiba khlain bad kila leit hiar shatei bad lap ia kine ki runar. Ka SIT kam shym la leit shatei tang ban kem ia kiba suba donkti, hynrei kala leit ha ryngkat ka sakhi kaba khlain bad tip kiei ki runar ba leh ia kane ka kam. Hadien ba kila leh homework bha, kila leit shatei bad da ka jingiarap ki Pulit na kitei ki Jylla, ngi la iohkem ia ki” ula bynrap.
Haba pynpaw ba ka jingpynlong ia ka jingiawad ia kine kiba jah ka long kaba jynjar bha, u Bah Vivek ula ong “Ha ka khyllip ba ju jah, ka jingther u slap ruh kala sdang bad da ka jinglong jong ka jaka ha ka thain, kam long kaba suk ia ngi ban hiar sha ki riat ki ram”.
