Shillong Jylliew 05: Ka FKJGP South West Khasi Hills hynne ka sngi Palei, kala dap da ka jingsngewnguh ia ka Sorkar Jylla haba kala ioh ia ka jingkular na u Symbud Myntri Rangbah ka Jylla u Bah Prestone Tynsong ba ka sorkar kala shimkhia ban ioh ban sdang noh ia ki kam ban shna ia ki 3 tylli ki surok kiba kongsan ha katei ka District.
U President ka FKJGP SWKH u Bah Keness Nonglait ula ong, ba ha ka 10 tarik u Nohprah 2024 u Myntri Rangbah ka jylla u Conrad K Sangma ula pynbna ban shna ia ka surok na Weiloi shaduh Keniong ha ka jinglut kaba long T.120 Klur bad kumta ka seng kala wan iakynduh ia u Bah Prestone Tynsong uba khmih ia ka tnad PWD Roads ban ai ia ka dorkhas bad ban pan jingshai halor kane ka surok.
“Ngi lah ioh ia ka jingkular na u Symbud Myntri Rangbah shen kin sa pynmih noh iaka Order khnang ba ki Consultant kin ioh leit peit bad survey ia kane ka surok bad ban shna ia ka Detail Project Report (DPR). U Bah Prestone ula ong, wat khuslai ha kaba iadei bad kane ka surok namar kan long kam beit. Kumta ka seng ka sngew ban ai burom ia ka sorkar, u Myntri Rangbah bad u Symbud Myntri Rangbah kiba la shimkhia halor kane ka surok” ong u Bah Keness Nonglait.
Ula ong, ka seng kala pynsngew ruh ia ka jingdawa na ka bynta ban shna pynheh noh iaka surok n a Weiloi shaduh Ranikor bad halor kane ruh, na ka liang u Symbud Myntri Rangbah ula pynthikna ia ngi ban shna ha ka wat kaba nyngkong ia ka surok naduh na Weiloi shaduh Phlangwanbroi.
Ka FKJGP SWKH kala dawa ruh ban shna pynheh noh ia ka surok na Jingkieng Ranikor shaduh Lad Alukoreng ban pynsuk ia ka leit ka wan jong ki paidbah bad kane kadei ka mat jingdawa kaba la slem jong ka seng.
“Naduh Khatphra shaduh ka Jingkieng Ranikor kadei ka surok ‘Two Lane’ hynrei naduh jingkieng Ranikor shaduh ka Lad Alukoreng kaba don 4 Km ka dang dei ka ‘Single Lane’ bad kala buh ha ka jingeh ha ka leit ka wan lada jia ba don kano kano ka kali kaba sinew, kumta ki kali ki sahkut haduh 3 kynta bad ha ka jingiakynduh ia u Bah Prestone ula iathuh ha ngi ba ula lum 3-4 sien ia ka jingialang bad ki kompani bad kala don ka jaka ban shna noh bad ong, ym dei ban khuslai ha kaba iadei bad kane bad shen ka tnad kan sa sdang noh ban pyntreikam noh ia kane ka surok” la ong u President ka FKJGP-SWKH.
Ula ong ba ha kane ka surok Single Lane, tang shu sniew kawei ka kali, kala pynsahkut da ki kynta ia ki kali ban iaid namar ba ka surok kala rit palat bad kila kyntu ia ki paidbah ba tang shu sdang ban pyntrei ia kane ka surok kidei ban ai ka jingiatreilang namar kan long ka jingmyntoi ia ka district baroh kawei khamtam haba ka surok ka long u budlum ia ka roi ka par.
