Shillong, Jylliew 04 : Ka Kynhun Myntri ka Sorkar jylla ha ka sngi Balang, ka la mynjur ia ka jingtyrwa ban pyntreikam ia ka Integrated Eco-Tourism Sustainable Agri-based Livelihood Development Project kaba 80 million dollars, kaba la bei pisa na ka Asian Development Bank (ADB).
Haba pyntip ia kane hadien ka jingialang, u Myntri Rangbah ka Jylla Conrad K Sangma ula ong “Kane ka dei ka project ba bei pisa na shabar. Ka project nyngkong eh ka dei 145 million dollar hynrei mynta ngi la pynhiar ia ka kat kum ka jingtyrwa ka Sorkar India ban buh da u pud ia ki project ba bei tyngka na shabar, kaba lah ban shim da ka Jylla”.
“Ia kane la leh namar ka Sorkar India ka dei ka bor ba khmih ha kaba ngi hap ban siew biang 80% jong ka ram na ka bynta ki Jylla NE bad ki Hill State bad kumta, ka Sorkar India ka sngew ba ki Jylla kin shim ia ka pisa hynrei kin hap ban siew pat bad dei halor kane, kala rai ban buh noh da u pud”.
U Myntri Rangbah u pyntip ba ka Meghalaya kala shim haduh T.12000 klur bad na kane, jan kot T.9000 klur la hap ban siew pat da ka Sorkar India. Haba buh hakhmat ia kane, ngi hap ban pynhiar noh ia ka project” haba bynrap “Kane ka project kan ym long tang shi jaka hynrei kan treikam ha kylleng ki jaka jong ka Jylla”.
U Conrad ula iathuh ba kane ka project nyngkong eh la thmu ban pyntrei tang ha ki thain Sohra hynrei ka ADB kala wan bad ong ba ka Sohra ka lah ban nym lah ban pyntrei ia baroh ki project kumta ngi la hap ban pyniar ia ki jaka.
“Kila ai jingmut ruh ba nalor ki kam jngohkai, dei ruh ban kynthup ia ka eco-tourism bad ka kam rep kam riang ha kane ka EAP. Da kaba pynshong nongrim ia kata ngi la pynkylla ia ka jingheh jong kane ka projek bad mynta ka sngi ngin sa kynthup lang ha baroh kawei ka Jylla.”
Ha kajuh ka por, ka kynhun Myntri kala ai jingmynjur ruh ia ka rai ban pyntreikam ia ka Meghalaya Right to Information Rules, 2025.
U Conrad ula iathuh ba ka Jylla Meghalaya kam pat pyntreikam satia ia kane ka rule ba thymmai bala mynjur da ka Sorkar Pdeng ha u snem 2012.
