Shillong, Jylliew 02: U Myntri Rangbah ka jylla u Conrad K. Sangma hynne ka sngi Nyngkong, ula leit jurip ia ka madan ialehkai jongka Shillong Sports Association (SSA) ha kaba iadei bad ka jingshna ia ki nala bad ula iakren ruh ha kaba iadei bad ka jingthmu ban pynbha ia kane ka Stadium.
Haba iakren bad ki nongthoh khubor hadien ka jingjurip, u Myntri Rangbah ula ong ba la pynlong ia ka jingjurip kadei hadien ka jingkyrpad jong u President, Secretary bad ki dkhot jong ka SSA. Ula kubur ba ka jingshna ia ki nala kala shimpor bha namar kiba bun ki daw bad kala don ruh ka jingthud ha ka rukom pynwandur ia ka plan kaba mynshwa.
“Kumba phi lah ban iohi, ka jingshna ia ki nala kala iaid shakhmat ban pynthikna ba ka um kan ioh tuid bha. Kila don ki mat kiba la mih mynshwa kaba la pynslem ban pyntrei ia ka kam, hynrei ngi mynta ngi lah trei ban pynbeit ia kitei ki jingduna bad ban pynthikna ba kane ka projek yn pyndep ha ka por kaba la buh” la ong u Conrad.
Namar ba ia ka SSA Football League yn sa sdang noh shen, kaban kynthup ia palat 100 tylli ki kynhun kiban iashimbynta, u Conrad ula banjur ia ka jingkyrkieh ban pyndep kloi noh ia ki kam ki jam baroh khlem da pynkylla ia ki tarik ban pynlong ia ki jingialehkai.
“Ngi lah khot ia ka tnad ialehkai baroh kawei, kynthup ia ki Engineer bad Contractor, ban pynthikna ba dei ban pyndep noh mardor. Ki lah kular ban pyndep ia ka kam hapoh jongka 8-9 sngi bad hadien kane yn sa lah ban pynlong noh ia ki jingialehkai” ula ong.
U Myntri Rangbah ula pynpaw ruh ia ka jingdonkam ia ka plan na ka bynta ban don ia ki jingtei kiba biang ha katei ka stadium. “Kane kadei ka stadium kaba kongsan tam, kadei u klongsnam jong ka Football ha Shillong bad baroh ki Club ki wan ialehkai hangne. Ka SSA kala kyrpad ia ka Master Plan ban pynbha ia ki Gallery, jinglong jingman bad ia ki jingdonkam baroh. Ngi thmu ban pynbha ia kane ka Stadium da kaba iaid da ki wat”.
U Conrad Sangma ula ong ba kane kadei ruh ka jaka kaba lah ban ai jingshakri na ka bynta ka National Games kaban sa wan, kumta ka long ruh kaba donkam bha ban kyntiew ia kane ka madan ialehkai.
Haba pynapw halor ki jingeh bad jingtynjuh, ula kdew ba ia ka Stadium ym shim la pyndonkam la 7 snem bad la sdang pyndonkam biang ia ka ha u snem 2022–23.
“Kaei kaba la hiar pateng kadei kaba la bun sa tang ki jingeh. Ka jingpynwandur ne Design ka lah dkoh ha ka jinglong ryntih, man la ki Block bad ki jaka shong ki iapher kawei na kawei bad wat ka jingsop ia ka sad ruh kam long kaba biang bad kam shym la don kano kano ka jingpyni ba kadei ka Stadium kaba la pynwandur bha” ula ong.
Ula batai ba ka jingpynbha ia kane ka jaka kan long kaba eh namar ba kadei ka Brownfield Project bad kam dei ka projek kaba thymmai, kaba mut kaba don ia ki jingteh namar ka jingdon lypa jong ki jingtei.
“Ngi la shah teh ha kiba bun ki jingeh hynrei ngin pyrshang ban leh ia kaba bha tam ban pynbha ia kane baroh kawei” la pynthikna u Conrad Sangma.
 ha kaba iadei bad ka jingshna ia ki nala bad ula iakren ruh ha kaba iadei bad ka jingthmu ban pynbha ia kane ka Stadium.){kind=link}